«Geo star» ulttyq olımpıadasy: 8 synyp oqýshysy Taılandqa joldama jeńip aldy

ASTANA. KAZINFORM – Elordada geografııa páninen ótken úsh kúndik «Geo star» ulttyq olımpıadasynyń qorytyndysy jarııalanyp, jeńimpazdar marapattaldy.

Bilim saıysyna eldiń búkil oblystary men Astana, Almaty, Shymkent qalalarynan iriktelgen 7–8-synyp oqýshylary qatysty. 

Geografııadan ulttyq olımpıada ótkizýdiń basty maqsaty — oqýshylardyń geografııa pánine degen qyzyǵýshylyǵy men yntasyn arttyryp, pánniń oqýshylar arasyndaǵy mártebesi men bedelin kóterý. 

Saıys eki kezeńde ótti. Birinshi kezeńde oqýshylar test suraqtaryna jaýap berse, ekinshi kezekte mektepte alǵan bilimderin is júzinde qanshalyq qoldana alatynyn dala jaǵdaıynda praktıkalyq tapsyrmalardy da oryndaý arqyly kórsetti. 

Qazylar alqasy balalardy osy tapsyrmalardy oryndaý deńgeıine qaraı baǵalap, júldegerlerdi anyqtady. 

Ulttyq olımpıada demeýshisi birinshi, ekinshi jáne úshinshi oryn ılengen oqýshylarǵa Apple Ipad, smart-saǵat, symsyz qulaqqap sııaqty baǵaly syılyqtar tabystady. Al júldege qol sozym jerden qaıtqandarǵa túrli yntalandyrý syılyqtary berildi. 

Bıyl ulttyq olımpıadanyń fınalyna shyqqan balalar osy pánnen Taılandta ótetin Azııa chempıonatyna joldama úshin qosymsha test tapsyrý kere edi. Birinshi oryn ıegeri, Almaty qalasyndaǵy Bilim jáne ınnovatsııa mektebiniń 8-synyp oqýshysy Erik Erlan bul jarysta da úzdik shyǵyp, Taıland joldamasyn ıelendi. 

Dástúrli bilim saıysyna «Daryn» respýblıkalyq ǵylymı-praktıkalyq ortalyǵy, «Astana daryny» daryndy balalar men talantty jastardy anyqtaý jáne qoldaý ortalyǵy, National Geographic Qazaqstan jýrnalynyń redaktsııasy ádistemelik jáne mazmundyq qoldaý kórsetip kele jatqanyn aıta ketý kerek. 

Buǵan deıin qazaqstandyq jas hımıkter Brazılııada ótken Mendeleev olımpıadasynda 11 medal jeńip alǵanyn jazǵan edik.