Genomdyq selektsııa asyl tuqymdy mal basyn arttyrýǵa kómektespek
ASTANA. 18 qyrkúıek. QazAqparat - Qazaqstanda sútti maldyń genetıkalyq áleýetin ósirýdi kózdeıtin birlesken joba qolǵa alyndy.
Bul týraly búgingi baspasóz máslıhatynda «QazAgroInnovatsııa» AQ-nyń basqarýshy dırektory Ismaıl Toqbergen málimdedi.
Onyń aıtýynsha, «QazAgroInnovatsııa» AQ jáne Frantsııanyń Aýyl sharýashylyǵy zerteýleri jónindegi ulttyq ınstıtýtynyń bastamasymen qolǵa alynǵan joba aıasynda sútti kóp beretin tólderdi iriktep, asyl tuqymdy iri qaranyń sanyn kóbeıtý kózdelip otyr. «Ol jobada genomdyq selektsııa ádisi qoldanylady. Oǵan sáıkes, eń aldymen, maldyń DNK-sy zerttelip, onyń negizinde asyl tuqymdy iri qara irikteledi. Bul ádistiń ereksheligi sol, madyń súttiligin erte kezde anyqtaýǵa bolady. Ony úsh jyldaı baǵyp, qansha sút beretindigin baıqap otyrýdyń qajet joq. Іri qaranyń DNK-sy arqyly asyl tuqymdylar irikteledi. Sonyń arqasynda sútti maldyń sanyn arttyrýǵa múmkindik bar», - deıdi I.Toqbergen.
Aıta keteıik, búginde osy saladaǵy jumysty «QazAgroInnovatsııa» AQ-ǵa qarasty Mal sharýashylyǵy men veterınarııa ǵylymı-ınnovatsııalyq ortalyǵynyń mamandary bastap, jergilikti jerge beıimdelgen 8-10 myń maldyń derekter bazasy ázirlenip jatyr. Ol úshin Frantsııanyń Aýyl sharýashylyǵyn zerteý jónindegi ulttyq ınstıtýtynda 1 myń DNK saralanatyn bolady.
