Gennadıı Shıpovskıh jol qaýipsizdigi týrasynda: baqylaý azaıyp, JKO sany artyp keledi
ASTANA. KAZINFORM – Senator Gennadıı Shıpovskıh óziniń depýtattyq saýalynda jol-kólik oqıǵalarynyń kóbeıýine jáne júrgizýshilerdi daıarlaý sapasynyń tómendeýine nazar aýdardy.
Depýtattyń málimetinshe, 2023 jyly elimizde 15 886 JKO tirkelgen. 2024 jyly bul kórsetkish kúrt ósip, 31 597-ge jetken. Al 2025 jyly 36 146 jol apaty oryn alǵan. Sonymen qatar, sońǵy 3 jylda myńdaǵan adam qaza taýyp, 100 myńnan astam adam túrli jaraqat aldy.
- Júrgizýshilerdi daıarlaý máselesi de erekshe nazar aýdarý qajet. Іshki ister mınıstrliginiń «Avtomektep» avtomattandyrylǵan aqparattyq júıesiniń málimetine sáıkes, búginde elimizde 727 avtomektep tirkelip otyr, al sonyń 160-y memlekettik, al 567-si jekemenshik. Sonymen birge, keıingi jyldary osy saladaǵy memlekettik baqylaý aıtarlyqtaı qysqartylǵany belgili. Atap aıtqanda, 2016 jyldan bastap avtomektepterdi ashý ruqsat berý tártibinen habarlama berý tártibine aýystyrylyp otyr. Al 2018 jyly ishki ister organdarynyń avtomektepter qyzmetine memlekettik baqylaý júrgizý fýnktsııalary tolyq alynyp tastaldy. Nátıjesinde, júrgizýshilerdi daıarlaý sapasyna qatysty talaptardyń álsireýi týraly qoǵamda jıi aıtylyp júr», - dep atap ótti senator.
Osyǵan baılanysty G. Shıpovskıh avtomektepterge qoıylatyn memlekettik baqylaý men akkredıtteý talaptaryn qalpyna keltirýdi, sondaı-aq oqý baǵdarlamalary men praktıkalyq daıyndyq standarttaryn kúsheıtýdi usynady.
Budan bólek, saýalda JKO sebepterin egjeı-tegjeıli taldaýǵa negizdelgen biryńǵaı analıtıkalyq júıeni qalyptastyrý máselesi kóterilgen. Bul aldyn alý jumystaryn tıimdirek júrgizýge múmkindik beredi. Sondaı-aq keptelisti azaıtý jáne qaýipsizdikti arttyrý úshin kóp kúsh túsetin qıylystarda zamanaýı retteý quraldaryn, sonyń ishinde «vafeldi jol tańbasyn» engizý usynylyp otyr.
- Jol qozǵalysyn uıymdastyrýdyń zamanaýı tásilderine nazar aýdarý qajet. Ásirese, iri qalalardaǵy jol qıylystarynda keptetilis saldarynan kólikterdiń qıylystyń ishinde toqtap qalýy jıi kezdesedi. Mundaı jaǵdaılar qozǵalystyń jalpy yrǵaǵyn buzyp qana qoımaı, jol-kólik oqıǵalarynyń týyndaýyna sebep bolady. Osy turǵyda álemdik tájirıbede keńinen qoldanylyp júrgen arnaıy «vafeldi jol tańbasyn» engizý tıimdi bolar edi. Bul tańba júrgizýshilerge keptelis kezinde qıylystyń ishine kirip toqtaýǵa bolmaıtynyn naqty kórsetedi. Nátıjesinde qıylystardyń bitelýi azaıyp, kólik qozǵalysy tártibi jaqsarady jáne jol qaýipsizdigi deńgeıi artady», - dedi depýtat.
Aıta keteıik, jyldyń basynan beri Astana qalasynda, Aqmola jáne Pavlodar oblystarynda avtomektepterdiń qyzmetin uıymdastyrý men júrgizýshi kýálikterin resimdeý kezinde zańsyz syıaqy alý, sondaı-aq ókilettikterdi teris paıdalaný faktileri anyqtalǵan.
