Gennadıı Golovkınniń jekpe-jegi ótetin jańa oryn belgili boldy
NUR-SULTAN. QazAqparat – ESPN telearnasynyń ınsaıderi Salvador Rodrıges qazaqstandyq boksshy Gennadıı Golovkın (41-1-1, 36 KO) men qarsylasy japon sportshysy Rıota Mýrata (16-2, 13 KO) arasyndaǵy jekpe-jektiń qaıda ótýi múmkin ekenin aıtty, dep habarlaıdy QazAqparat Sports.kz-ke silteme jasap.
«Bul aıqas Japonııadaǵy Tokyo Dome arenasynda ótýi múmkin», — dedi Rodrıges.
Buǵan deıin ol Golovkın men Mýrata komandalary kelissózder júrgizip jatqanyn habarlaǵan bolatyn. Alaıda japon boksshysy mundaı salmaqty qarsylaspen kezdespes buryn aldymen «qyzdyrynatyn» jekpe-jek ótkizgisi keledi.
Eske sala keteıik, Mýrata WBA Super nusqasy boıynsha orta salmaqta álem chempıony bolsa, Golovkın – IBF jáne IBO belbeýleriniń ıegeri. Sonymen qatar, osy jyldyń qyrkúıeginde ótýi múmkin Gennadıı Golovkın - Saýl «Kanelo» Alvares jekpe-jekteri trılogııasynyń sońǵy bólimi týraly áńgime basylar emes. Ol úshin Golovkınniń meksıkalyq Haıme Mýngııamen jekpe-jekte sátti óner kórsetýi qajetti shart bolyp otyr. Atalǵan aıqas shamamen mamyr aıyna josparlanǵan.
