Gennadıı Golovkınniń promoýteri sońǵy jańalyqtarmen bólisti

NUR-SULTAN. QazAqparat – IBF jáne IBO nusqalary boıynsha orta salmaqtaǵy álem chempıony Genadıı Golovkınmen (40-1-1, 35 KO) yntymaqtastyq ornatqan promoýter Tom Leffler GGG lagerindegi sońǵy aqparatpen bólisti, dep habarlaıdy QazAqparat Sports.kz saıtyna silteme jasap.

T.Leffler G.Golovkınniń aldaǵy jekpe-jegine qatysty aıta kele, ázirge naqty belgilengen data joq ekendigin atap ótti.

«Gennadıı jaǵdaıynda máseleler turaqty túrde ózgerip otyrady. Ol óziniń jattyǵý lagerin Djonaton Benkspen bastap, aldyn-ala jattyǵýlar ótkizip jatyr. Olar sparrıngter kezeńin jáne ózgelerin naqty bir data belgili bolǵanǵa deıin bastamaıdy. Naqty belgili bolǵan másele jóninde aldynda ala habarlaıtyn bolamyz. Djonatannan estýimshe, Gennadıı naǵyz babynda. Ol – árdaıym tártipti saqtaıtyn jigitterdiń biri. Bul jaǵynan aǵaıyndy Klıchkolarǵa uqsas. Ol artyq salmaq jınaýǵa ózine eshqashan erik bermeıdi, únemi bir qalypta. Balalary ony belsendi bolýǵa májbúr etedi. Gennadııdiń uly hokkeımen aınalysady, sondyqtan ol árdaıym balasynyń qasynda jáne fızıkalyq turǵyda belsendi. Qazir sizben buryn-sońdy ózim kórgen eń kóp jattyǵatyn sportshylardyń biri týraly aıtyp otyrmyz. Biz onyń rıngke oralýyn taǵatsyzdana kútýdemiz, biraq ázirge jarııalaıtyn eshteńe joq. Jaqyn ýaqytta jańalyq bolatynyna úmittenemin», — dedi Leffler jýrnalıst Kýrran Bhatııge bergen suhbatynda.