Gennadıı Golovkınniń meksıkalyq nokaýtshymen kezdesýi ótpeıtin boldy

NUR-SULTAN. QazAqparat – ESPN tilshisi Salvador Rodrıges meksıkalyq boksshy Haıme Mýngııanyń (36-0, 29 KO) múddesin qorǵaıtyn Zanfer Promotions kompanııasymen habarlasty, dep habarlaıdy QazAqparat Sports.kz saıtyna silteme jasap.

Jospar boıynsha Mýngııa 7 mamyrda kezekti kezdesýin Gennadıı Golovkınge (41-1-1, 36 KO) qarsy ótkizýi qajet bolatyn. Alaıda sońǵy aqparattar boıynsha Haımeniń 24 sáýir kúni óner kórsetetini belgili boldy. Bul degenińiz meksıkalyq boksshy Golovkınmen bul jol kezdespeıdi degen sóz. Mýngııanyń jekpe-jegi týraly egjeı-tegjeıli málimetter aldaǵy aptada jarııalanbaq.

Aıta keteıik, Gennadıı Golovkın men Mýngııa 2018 jyly-aq kezdesýi múmkin edi. Ol kezde Nevada shtatynyń komıssııasy 24 jastaǵy boksshynyń mundaı dárejedegi jarysta óner kórsetýi úshin tájirıbesi jetkiliksiz dep tapty.