Gennadıı Golovkınniń qoltańbasy bar qolǵap bássaýdada 1100 dollarǵa satylǵan

ALMATY. QazAqparat - Instagram jelisinde paıdalanýshy @gulmira001-diń ótkizgen qaıyrymdylyq bássaýdasynda Gennadıı Golovkınniń qoltańbasy salynǵan qolǵap 1100 AQSh dollaryna satylǵan.

«Jańa ǵana tanystyrýdy qajet etpeıtin adamnyń qoltańbasy bar jeke qolǵabyn tapsyrdyq. Men ony @amina_help_astana esimdi kishkentaı qyz bala úshin suradym. Bul qolǵaptyń jańa ıesine densaýlyq, balalarynyń batyr jáne chempıon bolýyn tileımin. Bul derttiń tumaý sııaqty tez emdelýin tileıikshi. Balalar ómir súrip, ósýi kerek. Bássaýda búgin saǵat 22:00-de aıaqtalady. Baǵany ózderińiz taǵaıyndaısyz, aqshany da ózderińiz jiberesiz, chektiń ornyna lot alasyzdar. Barlyǵymyzǵa sáttilik!» - delingen paıdalanýshynyń paraqshasyndaǵy mátinde.

Bássaýdadan túsken aqsha dárigerler «Ótkir lımfoblastalyq leıkoz» dıagnozyn qoıǵan jeti jasar Ámına Gılfanovany emdeýge jiberildi.

Qolǵapty satyp alýshynyń esimi - Anton Rýbın.