Gennadıı Golovkınniń 22 nokaýty
ASTANA. QazAqparat - Qazaqstandyq ataqty boksshy, orta salmaqtaǵy WBA(Super), IBO, WBC jáne IBF nusqalary boıynsha álem chempıony Gennadıı Golovkın (35-0, 32 KO) men IBF nusqasyndaǵy tıtýl ıegeri brıtandyq Kell Brýk (36-0, 25 KO) arasyndaǵy jekpe-jek kórermenge erekshe kóńil-kúı syılaıtyn bolady.
Bul týraly «GGG» tobynyń VKontakte áleýmettik jelisinde habarlandy.
«Kell Brýk bokstyń joǵary ıntellektine ıe, ol jeńilistiń aşy dámin tatpaǵan, ol chempıon ári óz «úıinde» sharshy alańǵa shyqqaly otyr. Sondyqtan da, bul men úshin úlken synaq bolǵaly tur», - dep jazady aldaǵy aıqas týraly jerlesimiz G.Golovkın.
Aıta keterligi, buǵan deıin Kell Brýk batys baspasózine bergen suhbatynda aldaǵy jekpe-jeginde jeńilýdi bilmegen Golovkındi nokaýtqa jiberip, álemdi «dúr silkindiretinin», osylaısha qazaqstandyq boksshynyń barlyq belbeýleri men tıtýlynan aıyratynyn aıtqan edi.
«Men álemdi dúr silkindiremin, sondyqtan keıinnen maǵan tań qalmańyzdar. Men jeńilmeıtin Golovkındy tize búktirip, onyń barlyq belbeýlerin tartyp alamyn», - dedi K.Brýk.
Áıtse de, bokstyń tisqaqqan sarapshylary jeńistiń Golovkınde bolatynyn alǵa tartady. Bul 34 jastaǵy Golovkınnyń bıylǵy jylǵy ekinshi jekpe-jegi. Bokstan orta salmaqtaǵy WBC, WBA (Super), IBO, IBF nusqalary boıynsha álem chempıony Gennadıı Golovkın (35-0, 32 KO) qyrkúıektiń onynda Londonnyń «O2» arenasynda ótetin aıqastyń naǵyz favorıti bolyp qala bermek.
Eske sala keteıik, Gennadıı Golovkın men brıtandyq boksshy Kell Brýk arasyndaǵy aıqas 10 qyrkúıekte London qalasyndaǵy 20 myń adamǵa arnalǵan «O2» arenasynda ótedi. Sharshy alańdaǵy sheberler ónerin búkil álemdegi mıllıondaǵan «GGG» jankúıerleri taǵatsyzdana kútip otyrǵanyn eske salǵymyz keledi. Aıta keterligi, Londonda ótetin Golovkınnyń kezekti jekpe-jegine bıletter áp-sátte satylyp ketken. Al jerlesimiz Gennadıı óziniń osynaý kezdesýin kelip tamashalaý úshin QR Premer-Mınıstri Kárim Másimovtyń atyna arnaıy shaqyrtý hatyn da joldaǵan bolatyn.
Aıta ketken jón jerlesimiz Golovkın 24 sáýirdegi sońǵy aıqasynda chempıon belbeýine úmitker amerıkalyq Domınık Ýeıdti tize búktirip, WBA nusqasynda 16-y ret chempıondyq tıtýlyn sátti qorǵaǵany este. Sýperchempıon, jeńimpaz GGG sońǵy aıqasynda Ýeıdti ekinshi raýndta nokaýtqa jiberip, óziniń eń úzdik jekpe-jekteriniń sanyn arttyrǵan bolatyn.
