Gennadıı Golovkınge WBO beldigin ıelený múmkindigi týdy

ASTANA. QazAqparat - WBO chempıony Demetrıýs Andrade (27-0, 17KO) Gennadıı Golovkınniń (38-1-1, 34KO) mindetti qarsylasy boldy. Bul týraly «Qazaqstannyń kásipqoı boksy» VKontakte áleýmettik jelisinde jazdy, dep habarlaıdy QazAqparat.

Atap ótilgendeı, qazaqstandyq boksshy Gennadıı Golovkın Dúnıejúzilik boks uıymynyń (WBO) orta salmaq sanatyndaǵy reıtınginde kósh bastady.

Buǵan deıin reıtıngtiń birinshi pozıtsııasynda WBO-nyń eks-chempıony Bıllı Djo Sonders (27-0, 13KO) boldy. Biraq brıtandyq boksshy ekinshi orta salmaq sanatyna aýysty jáne ol reıtıngte ekinshi orynǵa jaıǵasty.

«Golovkınniń tizimde kósh bastaýy onyń WBO tıtýlyna mindetti úmitker atanǵanyn bildiredi. Qazir beldiktiń ıegeri amerıkalyq Demetrıýs Andrade (27-0, 17KO)», - delingen aqparatta.

Eske salaıyq, 22 qańtar kúni WBO Demetrıýs Andradeni 30 kúnniń ishinde Sonderspen jekpe-jekke kelisýdi mindettedi. Olaı bolmaǵan jaǵdaıda, promoýterlik saýda-sattyq belgilenetini aıtyldy.

GGG 2018 jyldyń 16 qyrkúıegi kúni Las-Vegasta meksıkalyq boksshy Saýl Alvareske qarsy rematch ótkizip, tóreshilerdiń sheshimimen jeńilis tapty. Solaısha, ol WBA Super, WBC jáne IBO tujyrymdary boıynsha orta salmaqtaǵy chempıondyq beldikterinen aıyrylǵan edi.

⠀