Gennadıı Golovkınge sporttaǵy eńbegi úshin HOK tósbelgisi tabystaldy
ASTANA. QazAqparat - Halyqaralyq olımpıada komıteti Gennadıı Golovkınniń sportqa sińirgen eńbegi men álem sportynda qaldyrǵan murasyn moıyndaıdy. Halyqaralyq olımpıada komıtetiniń prezıdenti Tomas Bah Gennadıı Golovkınge osyǵan baılanysty olımpıadalyq aıyrym tósbelgisin joldady.
«Tósbelgide olımpıada oıyndarynyń nyshany belgilengen - bes dóńgelek pen Afıny-2004 degen jazý bar, bul qazaqstandyq boksshynyń osy Olımpıadaǵa qatysqanyn bildiredi. Onda kúmis enshilengen bolatyn», - delingen VKontakte jelisiniń GGG paraqshasyndaǵy habarlamada.
Aıta keterligi, Gennadıı Golovkın mamyr aıynda Monakodaǵy Gran-Prı júldesinde qonaq retinde qatysyp, sonda Monako knıazy ІІ Alber Tomas Bahpen resmı tanystyrǵan bolatyn. Sol kezdesýinde HOK basshysy sportshynyń tamasha jetistikterine bas ıetinin aıtyp, qazaqstandyq álem chempıonyna Halyqaralyq olımpıada komıteti atynan syılyq jasaıtynyn ýáde etken-di. Búgin osy tósbelgi GGG-diń Big Bear-degi jattyǵý lagerine de kelip jetti.
Eske sala keteıik, 2004 jyly Afınydaǵy Olımpıadada áýesqoı boksshy Gennadıı Golovkın (75 kelige deıingi salmaqta) kúmis júldeni ıelengen bolatyn. Sodan eki jyldan soń Golovkın kásipqoı bokstaǵy óziniń alǵashqy jekpe-jegin ótkizgen edi.
Bokstan orta salmaqtaǵy WBC, WBA (Super), IBO, IBF nusqalary boıynsha álem chempıony Gennadıı Golovkın (35-0, 32 KO) qyrkúıektiń 10-da Londonnyń «O2» arenasynda IBF nusqasyndaǵy tıtýl ıegeri brıtandyq Kell Brýkpen (36-0, 25 KO) kezdesedi.
