Gennadıı Golovkınge Qaraǵandy oblysynyń qurmetti azamaty kýáligi berildi

QARAǴANDY. QazAqparat - Orta salmaqta jeńilip kórmegen kásipqoı boksshy Gennadıı Golovkınge elge sińirgen eńbegi úshin «Qaraǵandy oblysynyń qurmetti azamaty» ataǵy berildi, dep habarlaıdy «QazAqparat» HAA tilshisi.

Sportshy kýálik pen medaldi jáne lentany alý úshin arnaıy kelgen. 

«Gennadııdiń ár kelgen sapary - biz úshin úlken oqıǵa», - dedi Qaraǵandy oblysynyń ákimi Erlan Qoshanov.

Gennadıı Golovkın berilgen ataq úshin alǵys aıtty.

 

«Maǵan kórsetken qurmetterińiz úshin alǵys aıtamyn. Óte qýanyshtymyn. Barlyq ata-analarǵa aıtarym - balalaryńyzdy sport sektsııalaryna alyp kelińizder. Barlyǵyńyz sportpen aınalysyp, densaýlyqtaryńyz myqty bolsyn», - dedi G.Golovkın Qaraǵandy oblysynyń qurmetti azamaty kýáligi tabys etilgennen keıin.

Golovkındi Qaraǵandy oblystyq máslıhatynyń XIII sessııasynda depýtattar biraýyzdan qoldaǵan bolatyn.

Depýtattar «Oblystyń Qurmetti azamaty» ataǵyn berý azamattyń elge sińirgen kópjyldyq eńbegi men erekshe qabiletin, belsendiligi men jaýapkershiligin kópshiliktiń moıyndaǵandyǵyn bildiretinin atap ótken edi.
Atalmysh ataq sonymen qatar azamattardyń qoǵamdaǵy belsendiligin arttyryp, oblystyń ekonomıkalyq jáne áleýmettik damýyna qosqan úlesin ulyqtap, óskeleń urpaqty qazaqstandyq patrıotızm úlgisinde tárbıeleýdi kózdeıdi.

Gennadıı Golovkın eshqashan jeńilip kórmegen kásibı boksshy, ol orta salmaqta óner kórsetedi. 2003 jyly ol áýesqoı boksshylar arasynda álem chempıony. 38 kezdesý ótkizip, onyń 37-in jeńispen aıaqtady. Tek bireýinde ǵana qarsylasymen teń tústi. «WBC World Champion» (orta salmaq), WBA Super World Champion (orta salmaq), IBF World Champion «orta salmaq), IBO World Champion (orta salmaq) ataqtarynyń ıegeri.