Gennadıı Golovkınge Astanadan páter syıǵa berildi
ASTANA. QazAqparat - Dańqty qazaqstandyq boksshy, orta salmaqtaǵy WBA, IBF IBO jáne WBC tujyrymdarynyń chempıony Gennadıı Golovkınniń Astanada jankúıerlerimen kezdesýi barysynda BI Group kompanııasynyń basshysy Aıdyn Raxymbaev sýperchempıonǵa elordadaǵy páterdiń kiltin saltanatty jaǵdaıda tartý etti.
Qazmedıa ortalyǵynda ótken kezdesýde jankúıerler Genany úlken qoshametpen qarsy aldy. Sportshymen júzdesý ashyq formatta ótti. Kez kelgen jankúıer óz saýalyn erkin jetkizýge múmkindik aldy. Óz kezeginde boksshy zaldan túsken ár saýalǵa jaýap qaıyrýǵa tyrysty.
Eń basty saýaldardyń biri - Gena men Saýl «Kanelo» Alvares arasyndaǵy jekpe-jektiń qashan uıymdastyrylatyny bolǵany jasyryn emes.
«Ony ózim de taǵatsyzdana kútip otyrmyn. Ol jekpe-jektiń uıymdastyrylýyna bar kúshimizdi salyp jatyrmyz. Men orta salmaqta barlyq belbeýlerdi ıelensem deımin», - dedi G. Golovkın.
Aıta keteıik, G. Golovkın kelesi kezdesýin kúzde ótkizetindigi belgili. Alaıda onyń qarsylasy áli anyqtalǵan joq. Saýl Alvares Gennadıı Golovkınmen kezdesýden bas tartqannan keıin, qazaqstandyq boksshy WBC tıtýlyna ıe bolǵan edi.
