Gennadıı Golovkın jaqyn arada sýperchempıon Felıks Shtýrmmen jekpe-jek ótkizýdi josparlap otyr

Bul jaıynda ol búgin Astanada málim etti.

«Búginde men kásibı bokstan eki nusqa boıynsha jeńimpaz atandym. Endi aldaǵy josparǵa toqtalatyn bolsaq, 2012 jyly álem chempıony ataǵyn qorǵap qalýǵa negizdelgen jekpe-jekterge qatysamyn. Qazirgi kezde úlken dodany ótkizý týraly kelissózder júrgizilip jatyr»,-dedi sportshy.

Onyń sózine qaraǵanda, bul jekpe-jek AQSh aýmaǵynda, ıaǵnı Las-Vegas qalasynda ótetin bolady. «Bunda men eki nusqadaǵy beldeýlerimdi qorǵaımyn. Atap aıtqanda, bul tartysta amerıkandyq chempıon meniń beldeýlerimdi jeńip alýǵa tyrasatyn bolady»,-dep málimdedi bylǵary qolǵap sheberi.

Sonymen qatar, G. Golovkın búginde sýperchempıon Felıks Shtýrmmen jekpe-jek ótkizý boıynsha kelissózder júrip jatqandyǵyn jetkizdi.

«Qazir osy eki chempıonmen kelissózder júrip jatyr. Qaısysy birinshi jaýap berse, sonymen kezdesemin»,-dedi G. Golovkın.

Álem chempıony Gennadıı Golovkın buǵan deıin 22 kezdesý ótkizip, onyń bárinde de (19-y nokaýtpen) jeńiske jetken bolatyn.

Budan buryn habarlanǵandaı, búgin Aqordada QR Memlekettik hatshysy Qanat Saýdabaev Gennadıı Golovkınge «Parasat» ordenin tapsyrdy.