Gennadıı Golovkın World Boxing prezıdenti laýazymyna saılaýaldy baǵdarlamasyn tanystyrdy
ASTANA. KAZINFORM — Qazaqstan Ulttyq olımpıada komıtetiniń basshysy Gennadıı Golovkın World Boxing uıymynyń prezıdenti qyzmetine kandıdat retinde óz baǵdarlamasyn usyndy, dep jazdy Sports.kz saıty.
Golovkınniń aıtýynsha, ol World Boxing uıymynyń Olımpıadalyq komıssııasynyń tóraǵasy retinde áriptesterimen birlese otyryp, uıymǵa jańa elderdi tartý baǵytynda jumys istegen. Sonyń nátıjesinde uıym Halyqaralyq olımpıadalyq komıtetten ýaqytsha taný mártebesin alyp, bokstyń 2028 jylǵy Olımpıada baǵdarlamasynda saqtalýyna qol jetkizgen.
— Sizderdiń senimderińizdiń arqasynda men bokstyń olımpıadadaǵy bolashaǵyn tek Los-Andjeles–2028 oıyndarynda ǵana emes, odan keıingi olımpıadalarda da ornyn bekitý úshin jumysymdy jalǵastyramyn. Sondaı-aq World Boxing uıymynyń HOK tarapynan tolyq moıyndalýyna qol jetkizýge tyrysamyn, — dep jazdy ol.
Golovkın óz kózqarasyn bylaısha baıandady:
-
2026 jyldyń basyna deıin daýys berý quqyǵy bar World Boxing sportshylar keńesin qurý;
-
Sýdıalyq jáne baqylaý júıesin táýelsiz ári ádil etý arqyly sportshylardyń quqyqtaryn qorǵaý;
-
Sportshylar men bapkerlerge arnalǵan World Boxing bilim akademııasyn iske qosý;
-
Oqý baǵdarlamalaryn sertıfıkattaý jáne maqsatty granttar bólý.
World Boxing prezıdentin saılaý 23 qarashada Rım qalasynda ótetin uıymnyń dúnıejúzilik kongresi kezinde ótedi. Golovkınniń basty qarsylasy — Grekııa boks federatsııasynyń basshysy Marıolıs Harılaos.
— Qadamym nyq bolýy úshin maǵan senim artýlaryńyzdy suraımyn. Biz buryn bolǵan kelispeýshilikterdi ótkenniń enshisine qaldyryp, sportshylar senetin, jankúıerler maqtan tutatyn jáne Olımpıadalyq otbasy senim artatyn uıym bolýymyz kerek. Biz ne jarııalasaq, qarjylandyrý máselesin ońtaıly sheshsek, shyn máninde qandaı jumys atqardyq – soǵan qarap meni baǵalańyzdar. Eger osy jaýapkershilikti maǵan senip tapsyrsańyzdar, men óz qyzmetimdi ádildikpen, senimmen jáne ómir boıy sportta qalyptastyrǵan tártippen atqaramyn, — dedi Golovkın.
Sondaı-aq ol World Boxing uıymyn myqty, ashyq, birtutas jáne sportshylarǵa baǵyttalǵan uıymǵa aınaldyrýǵa bolatynyn atap ótti.
Aıta keteıik, buǵan deıin Gennadıı Golovkın Lozannada ótken Olympism 365 komıssııasynyń otyrysyna qatysqan bolatyn.