Gennadıı Golovkın World Boxing federatsııasynyń prezıdenti bolyp saılandy
RIM. KAZINFORM — Ol halyqaralyq sport federatsııasyn basqarǵan alǵashqy qazaqstandyq atandy.
Daýys berý nátıjesinde sheshim biraýyzdan qabyldandy. Kongreske álemniń 58 federatsııasy qatysty.
Onyń ókilettik merzimi 3 jylǵa sozylady. ıAǵnı, Los-Andjeles Olımpıadasyna deıin jalǵasady.
Saılaýdan keıin sóz sóılegen Gennadıı Golovkın Borıs van der Vorst myrzaǵa, Atqarýshy keńeske jáne World Boxing uıymynyń barlyq múshelerine alǵysyn bildirdi.
— World Boxing prezıdenti retinde sizderdiń aldaryńyzda turý — men úshin zor mártebe ári qýanysh. Men adal ári jaýapkershilikpen qyzmet etemin. Biraq bul — tek bastamasy. Bizdiń mindetimiz aıqyn: boksty damytý jolynda qyzmet etý; HOK-tyń senimin tolyq qalpyna keltirý; sportshylarymyzdy Brısben Olımpıadasyna jáne odan keıingi oıyndarǵa qatystyrý, — dedi Gennadıı Golovkın.
Sonymen qatar GGG árbir boksshynyń taza ári qaýipsiz sportta ósip, damyǵanyn qalaıtynyn aıtty.
— Biz birikken kezde World Boxing — bir tutas otbasy sııaqty alǵa jyljıdy. Biz sózben emes, ispen Olımpıadalyq qaýymdastyqqa senim uıalatatyn federatsııa ekenimizdi dáleldeımiz. Biz táýelsiz bolamyz, biraq olımpıadalyq qundylyqtardy qurmetteımiz. Biz adaldyq, teńdik jáne sportshylardy qorǵaý jolynda jumys isteımiz. Birge senimdi kúsheıteıik, sportshylarymyzǵa qyzmet eteıik, Olımpıada oıyndaryndaǵy zańdy ornymyzdy ıeleneıik, — dedi Golovkın.
Búgin, 23 qarashada Italııa astanasy Rımde halyqaralyq boks kongresi uıymdastyryldy.
Bul shara álemdik boks úshin asa mańyzdy, sebebi kún tártibinde halyqaralyq World Boxing federatsııasy jumysynyń negizgi máseleleriniń biri — uıym prezıdentin saılaý turdy.
Ýákiletti organ 2025 jyldyń qazan aıynda usynylǵan barlyq ótinishti qarastyryp, tek komıssııa bekitken úmitkerlerdi saılaýǵa qatysýǵa ruqsat berdi.
Qazaqstannyń Ulttyq Olımpıada komıtetiniń prezıdenti, ańyzǵa aınalǵan boksshy Gennadıı Golovkın úmitkerlerdiń biri retinde tańdalǵan edi.
Osyǵan deıin Gennadıı Golovkın saılaý aldynda óziniń aldaǵy jumysynyń negizgi 4 baǵytyn atady.