Gennadıı Golovkın World Boxing federatsııasynyń prezıdenti bolady
ASTANA. KAZINFORM – Halyqaralyq boks federatsııasy World Boxing aldaǵy Kongresste ótetin saılaýǵa jiberilgen úmitkerlerdiń sońǵy tizimin jarııalady.
QR UOK málimetinshe, daýys berý 2025 jyldyń 23 qarashasynda Rım qalasynda ótetin Kongress otyrysy barysynda uıymdastyrylady.
Barlyq úmitker Sport Resolutions uıymynyń qoldaýymen jumys isteıtin úsh táýelsiz halyqaralyq sarapshydan quralǵan Táýelsiz baǵalaý komıssııasynyń tekserisinen ótti. Komıssııa olardyń kásibı talaptarǵa sáıkestigin baqylap, maquldaǵan úmitkerlerdi ǵana saılaýǵa jiberdi.
Quzyrly organ 2025 jyldyń qazan aıynda túsken barlyq ótinishti qarap, komıssııa oń qorytyndy bergen úmitkerlerdi saılaýǵa qatysýǵa ruqsat etti.
Prezıdent laýazymyna jalǵyz úmitker – Gennadıı Golovkın. World Boxing Jarǵysyna sáıkes, eger basshylyq qyzmetke bir ǵana úmitker usynylsa, Kongress ony balamasyz negizde, ıaǵnı biraýyzdan maquldaıdy.
Prezıdent saılaýynan bólek, kún tártibine vıtse-prezıdent pen Atqarýshy komıtettiń eki múshesin saılaý engizilgen. Tómende bekitilgen úmitkerlerdiń tizimi berilgen.
Vıtse-prezıdent laýazymyna úmitkerler:
- Chaıvat Chotıma (Taıland)
- Ishtvan Kovach (Vengrııa)
- Raıan O’Shı (Kanada)
Atqarýshy komıtetke úmitkerler:
- Mýlýd Býzıan (Frantsııa)
- Norbert Keller (Belgııa)
- Ishtvan Kovach (Vengrııa)
- Donatas Machıanskas (Lıtva)
- Mıhael Mıýller (Germanııa)
- Tatsýıa Nakama (Japonııa)
- Raıan O’Shı (Kanada)
Saılaý ótkizý tártibi
Kongress - World Boxing uıymynyń joǵary basqarý organy. Rımdegi otyrysqa vıtse-prezıdent Dına Glıkıdıs tóraǵalyq etedi. Saılaý protsesin táýelsiz qurylym qamtamasyz etedi. Sondaı-aq baqylaýshylar qatysyp, barlyq rásimniń ashyqtyǵy men reglamenttiń saqtalýyn qadaǵalaıdy.
Buǵan deıin Gennadıı Golovkın World Boxing prezıdenti laýazymyna saılaýaldy baǵdarlamasyn tanystyrǵanyn jazǵan edik.
Golovkın World Boxing uıymynyń prezıdenti laýazymyna resmı túrde úmitker atandy.
HOK World Boxing federatsııasyn ýaqytsha moıyndady.
World Boxing resmı túrde AIMS quramyna kirdi.