Gennadıı Golovkın: Ýordpen bir salmaqta aıqasqym keledi
ASTANA. QazAqparat - WBA/IBO tujyrymy boıynsha orta salmaqtaǵy álem chempıony Gennadıı Golovkın Andre Ýordpen teń jaǵdaıda, 164 fýnt salmaqta aıqasqysy keletindigin málim etti, dep habarlaıdy Sports.kz.
Budan buryn Ýord jekpe-jekti onyń salmaǵy - 168 fýntta ótkizýdi talap etken bolatyn.
«Ol myqty boksshy jáne biz úshin qyzyqty da. Bizge ǵana emes, barshaǵa. Men 50 de 50 bolǵanyn qalaımyn. Ol menimen judyryqtasqysy keledi. Men buǵan tolyq daıynmyn. Qazirgi ýaqytta onyń jaǵdaıy osydan eki jyl burynǵydaı emes. Al meniń jaǵdaıyma keletin bolsaq, anaǵurlym táýir. Men gonorardyń da, salmaqtyń da 50 de 50, ıaǵnı teń bolǵanyn qalaımyn. Bul kóńilge qonymdy»,-dep atap ótti Gennadıı.
