Gennadıı Golovkın Ulttyq ulan mýzeıine boks qolǵabyn tabystady
ASTANA. KAZINFORM — Ulttyq ulannyń Ortalyq mýzeıi erekshe qundy jádigermen tolyqty. Ańyzǵa aınalǵan qazaqstandyq boksshy Gennadıı Golovkın mýzeı qoryna óz qoltańbasy qoıylǵan boks qolǵabyn syıǵa tartty. Bul týraly qýatty qurylymnyń baspasóz qyzmeti málim etti.
Bul jańalyq Ulttyq ulannyń elordalyq 5573 áskerı bóliminiń áskerı qyzmetshisi Marlen Suramaev úshin aıryqsha mánge ıe. Ol bala kezinen Gennadıı Golovkınniń jekpe-jekterin jiti baqylap, onyń sabyrlylyǵy, eńbekqorlyǵy jáne chempıondyq minezine tánti bolyp ósti.
Almaty qalasynan merzimdi áskerı qyzmetke shaqyrylǵan ulandyqtyń ózi de bokspen uzaq jyldar aınalysqan. Marlen — Respýblıkalyq sport kolledjiniń túlegi, sport sheberligine kandıdat, Qazaqstan chempıonatynyń eki dúrkin kúmis júldegeri ári Almaty qalasynyń chempıony. Onyń aıtýynsha, dál Gennadıı Golovkınniń ómir joly oǵan úlken jeńisterdiń kúndelikti eńbek pen temirdeı tártiptiń arqasynda keletinin uǵyndyrǵan.
— Jýyrda Marlen Qurmet qaraýyly rotasynyń quramynda Gennadıı Golovkınniń esimi Dańq zalyna jazylýyna arnalǵan quttyqtaý beınerolıginiń túsirilimine qatysqan bolatyn. Al búgin ol sport sańlaǵynyń mýzeıge qolǵabyn tabystaǵany týraly jańalyqty erekshe ásermen qabyldady, — dep habarlady Ulttyq ulannan.
Gennadıı Golovkınniń qoltańbasy qoıylǵan boks qolǵaby mýzeı qorlaryna óte sırek tabystalatyn qundy jádigerlerdiń biri sanalady. Endi bul estelik quqyqtyq tártip áskerleriniń Ortalyq mýzeıinde saqtalyp, urpaqtar sabaqtastyǵynyń belgisi retinde jas áskerı qyzmetshilerge jiger beretin taǵylymdy mura bolmaq.
