Gennadıı Golovkın: Ýeıdpen kezdesýden keıin sporttyq mansabymdy aıaqtaýym múmkin
ASTANA. QazAqparat - WBA (Super), IBO, WBC (Interim) jáne IBF nusqalary boıynsha orta salmaqtaǵy Álem chempıony, qazaqstandyq Gennadıı Golovkın óziniń qazirgi jaǵdaıy men aldaǵy sporttaǵy mansaby týraly aıtyp berdi, dep habarlaıdy Sport.kz.
«Rıngten tys jerde meniń basqa ómirim bar. Bul meniń jumysym, sondyqtan men oǵan óte jaýapkershilikpen qaraımyn. Máselen, men keńsede qyzmet etsem, ol jerde de dál solaı ister edim. Rıngten basqa jerde men jaı ǵana qarapaıym jigitpin. Sharshy alańǵa shyǵý - bul oıyn emes. Meniń jarym, balam bar. Men óz jumysymda 100 paıyz qyraǵy bolýym kerek. Ózimdi osy 34 jasymda 25 jasymdaǵydaı sezinemin. Al 40 jasymda osy sportta qala alam ba? Men Qudaı emespin. Múmkin, men osy kezdesýden keıin (Ýeıdpen) sporttyq mansabymdy aıaqtaıtyn shyǵarmyn. Bul boks. Al dál qazir men ózimdi óte jaıly ári sergek sezinemin», - degen boksshynyń sózderin keltiredi Daily Mail.
Aıta keteıik, qazaqstandyq jankúıerler jekpe-jekti 24 sáýirde 07:00-den bastap «Qazaqstan» Ulttyq telearnasy men kaztrk.kz saıtynan tikeleı efırde tamashalaı alady. Sondaı-aq, elordadaǵy «Qazmedıa Ortalyǵynyń» led-ekrandarynan tamashalaı alý múmkindikterińiz bar.
Buǵan deıin kezdesý 07:20-da bastalady dep habarlanǵan bolatyn.
