Gennadıı Golovkın týraly fılm jarııalandy
ASTANA. QazAqparat - Atalǵan fılmde bokstyń "altyn ǵasyry" jaıynda baıandalady. Al GGG men "Kanelo" arasyndaǵy jekpe-jek sol bir kezeńdi qaıta asha alady, dep xabarlaıdy QazAqparat tilshisi.
Fılmniń rejısseri - Oskar de la Hoııa. Ol - meksıkalyq boksshy Saýl Alvarestiń promoýteri. Oǵan Golovkınniń promoýteri Tom Leffler de kómektesti. Stsenarıı boıynsha kadrdan tys daýys birinshi jaqtan sóıleıdi. "Men - bokspyn!" dep bastaıdy qońyr daýys. Sodan bastap ol óziniń "altyn dáýirin" eske alady. Fılmde túsken promoýter Don Chardjın de kásibı bokstaǵy uly tulǵalar jaıynda baıandaıdy. Osydan keıin reper Ice Cube bokstan kúsh-qýat pen jyldamdyqty talap etedi, bokstyń ózi de sol qasıetterdiń qaıtyp kelgenin tileıdi. Sóıtip, rejısser 16 qyrkúıek kúni Golovkın men Alvares arasyndaǵy jekpe-jekte burynǵy naǵyz bokstyń qaıta oıanatynyn keltiredi.
Aıta keteıik, atalǵan fılm Golovkın men Alvarestiń London, Nıý-Iork men Los-Andjeles qalalarynda ótken press-týry barysynda kórsetildi. Buǵan deıin GGG óz paraqshasynda press-týrdyń vıdeosyn jarııalaǵan bolatyn. Budan bólek, Golovkın Meksıkanyń ózinde jankúıerleriniń az emes ekenin kórsetti .
