Gennadıı Golovkın soqqynyń dáldigi boıynsha reıtıngte úshtikke endi
ASTANA. QazAqparat - WBA jáne IBO nusqalary boıynsha orta salmaqtaǵy álem chempıony 32 jastaǵy qazaqstandyq Gennadıı Golovkın jekpe-jekterdegi soqqylardyń esebimen aınalysatyn CompuBox kompanııasynyń "plıýs/mınýs" reıtınginde úshtikke endi, dep habarlaıdy Vesti.kz.
Reıtıng "plıýs/mınýs" - dál tıgen jáne bosqa siltengen soqqylar arasyndaǵy aıyrmashylyqtar. Sarapshylardyń esepteýlerine qaraǵanda, Gennadıı Golovkınniń soqqylarynyń 39 paıyzy óz nysanasyna dóp tıip jatqan. Al aýa qarmap qalýy - 22 paıyz.
Soǵan sáıkes qazaqstandyq boksshynyń shabýyly men qorǵanysynyń aıyrmashylyǵy + 17. Osy jetistikteriniń arqasynda Gennadıı Golovkın soqqysynyń tıimdiligi jaǵynan boksshylar arasyndaǵy reıtıngte úshinshi oryndy ıelendi.
