Gennadıı Golovkın Saýd Arabııasynyń Boks federatsııasymen kezdesti
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti, World Boxing Olımpıadalyq komıssııasynyń tóraǵasy Gennadıı Golovkın issaparmen Saýd Arabııasyna bardy.
QR UOK málimetinshe, Er-Rııadtaǵy kezdesýge Saýd Arabııasynyń Boks federatsııasynyń prezıdenti Abdýlla Alarbı, Saýd Arabııasy UOK bas hatshysynyń keńse dırektory Nasser Mýnır, World Boxing uıymynyń bas hatshysynyń mindetin atqarýshy Maık Makattı jáne Qazaqstan UOK bas hatshysy Álimjan Aqaev qatysty.
Saýd Arabııasynyń Boks federatsııasy World Boxing uıymyna qosylǵanyn rastady. Kezdesý barysynda taraptar olımpıadalyq bokstyń bolashaǵyn, onyń ishinde 2028 jyly Los-Andjeleste ótetin Olımpıada oıyndaryndaǵy mártebesin, sondaı-aq, bul sport túrin qoldaýdaǵy Saýd Arabııasynyń rólin talqylady.
Sonymen qatar jaqynda bokstyń Bahreın-2025 jasóspirimder arasyndaǵy Azııa oıyndaryna engizilýi de negizgi taqyryptardyń biri boldy. Gennadıı Golovkınniń bul bastamasy aımaqtyq deńgeıde jáne Asian Boxing konfederatsııasynda keńinen qoldaý tapty. Budan bólek, boksty Islam yntymaqtastyǵy oıyndarynyń baǵdarlamasyna qosý múmkindigi qarastyryldy.
Kezdesý barysynda World Boxing uıymynyń bedelin arttyrý boıynsha josparly jumystar júrgizilip jatqany atap ótildi. Uıym aımaqtyq federatsııalardy qurý jáne jańa elderdi tartý arqyly óz aýqymyn keńeıtýde. Negizgi maqsattardyń biri – Halyqaralyq Olımpıadalyq komıtetiniń (HOK) tolyqqandy moıyndaýyna qol jetkizý.
World Boxing ókilderi ádil jáne ashyq tórelik júıesin qamtamasyz etý boıynsha atqarylyp jatqan jumystar jóninde málimet berdi. Uıym tóreshiler quramyn jetildirý, biliktilikti arttyrý kýrstaryn ótkizý jáne jasandy ıntellektke negizdelgen zamanaýı tehnologııalardy engizý baǵytynda jumys istep jatyr. Bul sýbektıvti qatelikterdi azaıtyp, jekpe-jekterdiń ádil baǵalanýyn qamtamasyz etedi.
Sonymen qatar Los-Andjeles-2028 Olımpıadasyna irikteý júıesi de talqylandy. Qazirgi ýaqytta irikteý júıesi ázirlenip jatyr, al kelesi jyly joldamalardy bólý qurylymy naqty bekitiledi.
Saýd Arabııasy Qazaqstanmen ekijaqty yntymaqtastyqty damytý týraly bastama kóterdi. Bul yntymaqtastyq birlesken oqý-jattyǵý jıyndaryn, sparrıng-sessııalar uıymdastyrýdy, sondaı-aq menedjment jáne bapkerlik qyzmet boıynsha tájirıbe almasýdy qamtıdy.
– World Boxing federatsııasy óz jumysynyń negizgi baǵyttary men basymdyqtaryna erekshe nazar aýdaryp otyr. Mańyzdy seriktestermen yntymaqtastyqty nyǵaıtý – basty mindetterimizdiń biri. Búgingi kezdesý bizdiń maqsattarymyz ben qundylyqtarymyz kóptegen eldiń qoldaýyna ıe ekenin dáleldeıdi. Kóptegen memleket bokstyń turaqty damýyna múddeli jáne Saýd Arabııasynyń World Boxing quramyna qosylýy – ıslam álemindegi bul sporttyń ilgerileýi úshin úlken qadam. World Boxing Olımpıadalyq komıssııasynyń tóraǵasy retinde meniń basty maqsatym – boksty Olımpıada oıyndarynyń baǵdarlamasynda saqtaý, – dedi Gennadıı Golovkın.
Saýd Arabııasynyń Boks federatsııasy óz kezeginde World Boxing bastamalaryna belsendi qatysýǵa daıyn ekenin bildirdi.
Gennadıı Golovkın AQSh-qa baryp, jattyǵý zaldaryn kórgen bolatyn.