Gennadıı Golovkın Reseı Olımpıadalyq komıtetiniń tóraǵasymen kezdesti

ASTANA. KAZINFORM – 46-shy Azııa Olımpıadalyq keńesiniń Bas assambleıasy aıasynda Qazaqstan Ulttyq Olımpıadalyq komıtetiniń prezıdenti jáne World Boxing halyqaralyq federatsııasynyń basshysy Gennadıı Golovkın men Reseı Federatsııasynyń sport mınıstri, Reseı Olımpıadalyq komıtetiniń tóraǵasy Mıhaıl Degtıarevtiń kezdesýi ótti.

Kezdesýge sondaı-aq Reseı Olımpıadalyq komıteti men Reseı Federatsııasy Sport mınıstrliginiń ókilderi qatysty.

QR UOK málimetinshe, taraptar qazirgi halyqaralyq sport kún tártibine qatysty birqatar máseleni jáne Ulttyq Olımpıadalyq komıtetterdiń halyqaralyq alańdardaǵy ózara is-qımylyn talqylady. Áńgime barysynda júzige asyrý tetikteri, halyqaralyq bastamalarǵa qatysý tájirıbesi, sondaı-aq, olımpıadalyq qozǵalystyń turaqty damýy úshin sport uıymdary arasyndaǵy tikeleı dıalogtyń mańyzy sóz boldy.

Jastar sportyna erekshe nazar aýdarylyp, basqarý jáne uıymdastyrýda tájirıbe almasý máseleleri, sonyń ishinde qoldanystaǵy reglamentter aıasynda halyqaralyq sport uıymdarynyń ınstıtýtsıonaldyq qyzmeti talqylandy.

Reseı delegatsııasy qazaqstandyq tarapqa Reseı Olımpıadalyq komıteti Sportshylar komıssııasynyń keńeıtilgen otyrysyna jáne 2026 jyly ótetin jas olımpıadashylardyń IV halyqaralyq forýmyna (YOIF 2026) qatysýǵa shaqyrý joldady.

Kelissózder qorytyndysy boıynsha taraptar turaqty jumys dıalogyn jalǵastyrýǵa jáne ózara qyzyǵýshylyq týdyratyn máseleler boıynsha syndarly yntymaqtastyqty damytýǵa nıetti ekenin rastady.

Aıta keteıik, Ózbekstan prezıdenti Shavkat Mırzıeev Tashkent qalasynda World Boxing halyqaralyq federatsııasynyń prezıdenti Gennadıı Golovkındi qabyldady.