Gennadıı Golovkın Parıjde birqatar qorytyndy kezdesý ótkizdi
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Parıjde mańyzdy kezdesýler ótkizdi. Bul týraly UOK habarlady.
Atalǵan júzdesýler – Qazaqstan UOK-tiń halyqaralyq baǵyttaǵy jumystarynyń bir parasy. Kezdesýler barysynda Qazaqstan men Azııa qurlyǵynda sportty damytý máseleleri talqylandy.
Qazaqstan UOK basshysy Ulttyq Olımpıadalyq komıtetter Qaýymdastyǵynyń (UOKQ) prezıdenti Robert Mıtchell men uıymnyń bas hatshysy Gýnılla Lındbergpen ótken kezdesýde UOKQ Bas Assambleıasyna daıyndyq barysyna toqtaldy. Assambleıa otyrysy aǵymdaǵy jyldyń qarashasynda Portýgalııada ótedi. Odan bólek, 2025-2028 jyldarǵa arnalǵan Olımpıadalyq nıettestik baǵdarlamasy egjeı-tegjeıli talqylandy. Kezdesý barysynda kóterilgen taǵy bir mańyzdy taqyryp – Ulttyq Olımpıadalyq komıtetterdi qoldaý jáne Qazaqstannyń halyqaralyq sporttyq qoǵamdastyqtaǵy rolin nyǵaıtyp, otandyq sportty damytýǵa qosymsha kúsh beretin Olımpıadalyq qozǵalysty ǵalamdyq deńgeıde damytý strategııasy boldy.
Gennadıı Golovkın Bahreın UOK prezıdent, joǵary mártebeli Haled bın Hamad Ál Halıfa jáne Katar UOK basshysy, sheıh Djoan bın Hamad ál-Tanımen ótken kezdesýde Azııadaǵy sport máselesin ortaǵa saldy. Taraptar Azııadaǵy sportty odan ári damytý múmkindikteri men UOK-ter arasyndaǵy áriptestikti nyǵaıtý jáne qazaqstandyq sportshylardyń halyqaralyq jarystarǵa qatysýyn sóz qyldy. Sondaı-aq, Qazaqstan UOK basshysy Katar jáne Bahreın quramalaryn Olımpıada oıyndarynda sátti óner kórsetýimen quttyqtady.
Olımpıadanyń sońǵy kúninde Gennadıı Golovkın men Halyqaralyq Olımpıada komıtetiniń Parıjdegi 142-sessııasynda jańadan múshelikke saılanǵan AQSh UOK prezıdenti Djın Saıks kezdesti.
Gennadıı Golovkın men Djın Saıks Qazaqstan men AQSh arasyndaǵy sporttyq qarym-qatynasty nyǵaıtý máselelerin kóterip, Olımpıadalyq qozǵalys aıasyndaǵy birlesken jobalar múmkindigin talqylady. Golovkın Saıksty HOK músheligine saılanýymen quttyqtap, halyqaralyq sporttyq qoǵamdastyq aıasynda jańa bastamalardy sátti júzege asyratynyna senim bildirdi.
Sondaı-aq Qazaqstan UOK basshysy Halyqaralyq gımnastıka federatsııasynyń (FIG) prezıdenti ári HOK múshesi Morınarı Vatanabemen kezdesti. Vatanabe myrza Golovkınge QR UOK Prezıdenti qyzmetinde sáttilik tilep, barsha Qazaqstan halqyn Narıman Kýrbanovtyń tarıhı júldesimen quttyqtady. Áńgime barysynda FIG prezıdenti qazaqstandyq atletterdiń sporttyq gımnastıkadan turaqty nátıje kórsetip júrgenin alǵa tartyp, Qazaqstanda gımnastıkanyń damyp kele jatqanyn erekshe atap ótti. G. Golovkın atalǵan sport túrinen Olımpıada júldesin alý elimizdegi gımnastıkanyń jańa qarqynmen damýyna yqpal etetinin aıtty. Sóz sońynda taraptar eki uıym arasyndaǵy ara qatynasty ári qaraı da nyǵaıta túsýge ýáde berdi.
«Gennadıı Golovkınniń Parıj Olımpıadasyndaǵy jumys kestesi óte tyǵyz boldy. Jarysqa baryp, bizdiń sportshylardy úzdiksiz qoldaýdan bólek, UOK basshysy halyqaralyq qatynastardy jaqsartyp, qazaqstandyq sportty damytýdyń keıbir múmkindikterine baǵyttalǵan birshama mańyzdy kezdesý ótkizdi. Biz halyqaralyq qoǵamdastyq tarapynan Qazaqstan UOK jańa prezıdentine degen úlken qyzyǵýshylyq baıqap otyrmyz jáne onyń álemdik sporttaǵy iri tulǵa ekeni, sonymen qatar olımpıadashy retinde tanylǵany da bizdiń qyzmetimizge oń áser etýde. Biz UOK-ke kelgen birneshe aı ishinde halyqaralyq baǵytty retteýge arnalǵan aýqymdy jumys atqaryldy. Komandamyzdyń áý bastan tańdaǵan strategııasy da osy bolatyn. Parıjde ótken kezdesýler tek bastamasy ǵana, aldaǵy kúz aılary UOK úshin qarbalasqa toly bolmaq», - dedi Qazaqstan UOK bas hatshysy Janar Ýtesheva.
