Gennadıı Golovkın óziniń burynǵy menedjerlerin sotqa berdi

ASTANA. QazAqparat - Amerıkanyń TheBlast.com basylymynyń málimetinshe, orta salmaqtaǵy burynǵy álem chempıony Gennadıı Golovkın óziniń burynǵy menedjerleri Maksımılıan jáne Oleg Germandardy sotqa berip, olardan iri aqshalaı ótemaqyny talap etip otyr, dep habarlaıdy Sports.kz.

Sot qujattaryna sáıkes, Golovkınniń aıtýynsha, Maksımılıan jáne Oleg German ádeıi tabys týraly esep bermeı, somalary qujattaǵydan áldeqaıda joǵary bolǵan komıssııa tólemderin alyp júrgen. Oǵan qosa, menedjerler Golovkınniń sońǵy jekpe-jekterin uıymdastyrýda eshqandaı qyzmet kórsetpese de ol úshin aqy tóleýdi talap etip otyr.

GGG Germandarmen iskerlik qatynasyn 2017 jyly úzgenin málim etti, alaıda olarmen kelisimshart úzilse de burynǵy menedjerler Golovkınniń Saýl «Kanelo» Alvarespen ekinshi jekpe-jeginen barynsha tabys tabýǵa tyrysqan.

Basylymnyń málimetinshe, Gennadıı olardan burynǵy kelisimderinen olar paıda kórgen 3,5 mıllıon AQSh dollary kólemindegi somanyń qaıtarylýynan úmitti. Ol sondaı-aq menedjerlermen baılanysyn resmı túrde úzetin sot sheshimin kútip otyr.