Gennadıı Golovkın óziniń basty qarsylasyn atady

NUR-SULTAN. QazAqparat – Qazaqstandyq boksshy Gennadıı Golovkın óziniń basty qarsylasy kim ekenin, 5 qazan kúni ótetin ýkraınalyq Sergeı Derevıanchenkomen jekpe-jekten ne kútetinin aıtyp berdi, dep habarlaıdy QazAqparat Sports.kz silteme jasap.

«Men eshkimnen úlgi almaýǵa tyrysamyn. Ádeıi. Men óz jasymda qolymnan kelse, sonyń bárin jasap, tynymsyz eńbektenip jatyrmyn. Endi meniń jankúıerlerim men sarapshylar qanshalyqty ter tógip, qansha kúsh-jiger jumsaǵanymdy baǵalaı alady. Meniń basty qarsylasym belgili bir adam emes. Meniń basty qarsylasym – ol meniń qazirgi jasym men motıvatsııam. Men aldaǵy jekpe-jektiń bolatynyna qýanyshtymyn. Maǵan Nıý-Iorktegi boks atmosferasy unaıdy», - dep keltiredi sportshynyń sózin Boxinginsider.com.

Eske sala keteıik, Golovkın - Derevıanchenko aıqasy besinshi qazan kúni Nıý-Iorktegi «Medıson Skver Garden» arenasynda ótedi. Qos boksshy IBF jáne IBO chempıony tıtýldaryn sarapqa salady.