Gennadıı Golovkın Ózbekstan prezıdenti Shavkat Mırzıeevpen kezdesti
ASTANA. KAZINFORM – Ózbekstan prezıdenti Shavkat Mırzıeev Tashkent qalasynda World Boxing halyqaralyq federatsııasynyń prezıdenti Gennadıı Golovkındi qabyldady.
Ulttyq olımpıadalyq komıtettiń málimetinshe, resmı kezdesý barysynda taraptar olımpıadalyq boksty damytý, halyqaralyq yntymaqtastyqty nyǵaıtý jáne áriptestik aıasyn keńeıtý máselelerin talqylady.
Gennadıı Golovkın Ózbekstannyń álemdik bokstaǵy strategııalyq mańyzyna erekshe toqtalyp, eldiń Azııa aımaǵynda boksty damytýǵa belsendi úles qosyp kele jatqanyn, sondaı-aq álemdik jáne qurlyqtyq deńgeıdegi jarystardy uıymdastyrýdaǵy tájirıbesin atap ótti.
Kezdesý kezinde taraptar ortaq jobalardy iske asyrýdyń negizgi baǵyttaryn, sport nysandaryn damytý máselesin jáne qurlyq kóleminde olımpıadalyq qozǵalys aıasyndaǵy ózara yntymaqtastyqty júıeleý joldaryn talqylady.
World Boxing federatsııasynyń basshysy jyly qabyldaý úshin alǵysyn bildirip, halyqaralyq uıymnyń Ózbekstanmen tyǵyz yntymaqtastyqty jalǵastyryp, óńirde boksty damytýǵa baǵyttalǵan ortaq jobalardy júzege asyrýǵa daıyn ekenin rastady.
Aıta keteıik, Gennadıı Golovkın Tashkent qalasynda jumys saparymen júr. Buǵan deıin ol Azııa Olımpıadalyq keńesiniń Bas assambleıasynyń otyrysyna qatysqan bolatyn.
Buǵan deıin Tashkentte Azııa Olımpıadalyq keńesiniń jańa tóraǵasy saılanǵanyn, mártebeli qonaqtar arasynda World Boxing uıymynyń prezıdenti Gennadıı Golovkınniń bolǵanyn jazǵanbyz.