Gennadıı Golovkın Olımpıada chempıonyna aǵalyq aqylyn aıtty

MILAN. KAZINFORM — Qazaqstan ulttyq Olımpıada komıtetiniń tóraǵasy Gennadıı Golovkın 2026 jylǵy qysqy Olımpıada chempıony atanǵan Mıhaıl Shaıdorovty arnaıy quttyqtady.

Olımpıada oıyndarynyń kúmis júldegeri, ańyz boksshy ómirlik tájirıbesimen bólisip, jas chempıonǵa aqyl-keńesin aıtty.

— Siz endi Olımpıada otbasynyń múshesisiz. Biraq bul medaldiń da eki jaǵy bar. Adam bolyp qala berińiz. Olımpıada chempıony bolý — úlken jaýapkershilik. Adam bolyp qalsańyz, bul naǵyz jetistik. Men sizdiń qazirgi bolmysyńyzdy saqtap qalýyńyzdy qalaımyn. Olımpıada altyny — sizdiń mańdaı terińiz, eńbegińiz, tabandylyǵyńyzdyń jemisi. Biraq medal sizdi tulǵa retinde aıqyndamaıdy. Al ózińizdi tulǵa retinde anyqtaý úshin siz ózińizdiń adamı qasıetterińizdi saqtaýyńyz kerek. Ol (medal — red.) barlyq esikti asha bermeıdi, — dedi Golovkın.

Shaıdorov óz kezeginde Gennadıı Golovkınge jáne mınıstr Erbol Myrzabosynovqa rahmetin aıtty.

— Men barlyq qazaqstandyqqa úlken alǵys aıtqym keledi. Pikirler óte kóp boldy, jáne barlyǵy maǵan qysym bolady dep oılady, biraq kerisinshe boldy. Bul meni shynymen jigerlendirip, kúsh berdi. Men tek kúreskim keledi jáne sońyna deıin kúrestim, — dedi sportshy.

Osyǵan deıin habarlaǵanymyzdaı, Mıhaıl Shaıdorov araǵa 32 jyl salyp, el qorjynyna qysqy Olımpıada oıyndarynyń kezekti altyn júldesin syılady.

Marapattaý saltanatynan keıin sportshy BAQ ókilderine shaǵyn suhbat berip, qazaqstandyqtarǵa sálemin joldady.