Gennadıı Golovkın Nazarbaev Ýnıversıtetinde qazaqstandyq jankúıerlerimen júzdespek
ASTANA. QazAqparat - Gennadıı Golovkın Qazaqstandaǵy jankúıerlerin 22 qarasha kúni Nazarbaev Ýnıversıtetinde jınamaq. Bul týraly VKontakte jelisindegi GGG qaýymdastyǵynyń paraqshasynda habarlandy.
"Barlyqtaryńyzdy 22 qarashada Nazarbaev Ýnıversıtetine Gennadıı Golovkınmen bolatyn kezdesýge shaqyramyz", - delingen habarlamada.
Onda málim etilgendeı, Meksıkada WBC men HBO-nyń uıymdastyrýymen birqatar sharalar ótpek, sonymen qatar aqpan aıynda kelesi jekpe-jek josparlanǵandyqtan, jattyǵýǵa kirisý kerek bolyp otyr. Bul jaǵdaılar G.Golovkınniń josparlaryna ózgerister engizdi. "Sondyqtan jankúıerlermen kezdesý tek Astanada jáne kelesi aptanyń sońynda bolady. Gennadıı Golovkın Qazaqstanǵa budan soń qashan keletinin de naqtylaǵan joq. Bir anyǵy, ol tek 2015 jyly bolýy múmkin. Sol sebepten sizderdi 22 qarashada kútemiz. Súıikti boksshylaryńyzben betpe-bet júzdesý múmkindigin jiberip almańyzdar!", - dep naqtylanǵan paraqshada.
