Gennadıı Golovkın: Mıýrreı ekeýmizdi úlken syn kútip tur
ALMATY. QazAqparat- Orta salmaqta WBA (Super) jáne WBC (Interim) nusqalary boıynsha Álem chempıony 32 jastaǵy qazaqstandyq boksshy Gennadıı Golovkın (31(28)-0-0), 2015 jyldyń 21 aqpanynda Álem chempıondyǵyna burynǵy úmitker 32 jastaǵy brıtandyq boksshy Martın Mıýrreımen 29(12)-1-1) qolǵap túıistiredi.
Boks keshi Monako Knıazdiginiń Larvotto aýdanyndaǵy ataqty Salle des etoiles arenasynda ótedi. Budan eki kún buryn, 4 jeltoqsan kúni London qalasynda aldaǵy saıysqa qatysty baspasóz máslıhaty ótken bolatyn. Osyǵan baılanysty Gennadıı Golovkın búgin Brıtanııa astanasynda SecondsOut portalyna bergen suhbatynda aldaǵy jekpe-jekke qatysty óz oılarymen bólisti, -dep habarlaıdy allboxing.ru saıty.
«Ol tamasha boksshy. Óte myqty jigit. Bul naǵyz jekpe-jek bolaıyn dep tur. Bul kádimgi kóshe tóbelesi sekildi. Mıýrreı nokaýtpen jeńilip kórgen emes. Demek, ekeýmizdi úlken syn kútip tur. Al Monako ǵajap memleket. Keremet arena. VIP-atmosfera. Sondyqtan men: Monakodaǵy meniń jekpe-jegime qosh keldińizder! - degim keledi!»
«Anglııada jekpe-jek ótkizýge daıynsyń ba?», - degen suraqqa Gennadıı bylaı dep jaýap berdi:
«Martın Mıýrreı Brıtanııanyń orta salmaq dárejesindegi úzdik boksshysy. Ekinshi orta salmaqtaǵy úzdik boksshy - Karl Froch. Al Anglııadaǵy jekpe-jekke keletin bolsaq, nege bolmasyn? Men daıynmyn. Anglııada jekpe-jek ótkizýge úmitim zor».
Deıturǵanmen, Golovkın bul joly da óziniń dittegeni ázirge tek orta salmaq ekendigin aıtty.
«Qazir meniń kózdegenim tek 160 fýnttyq (72,6 kg) salmaq dárejesi. Orta salmaqta kimniń nómiri birinshi bolatyndyǵy men úshin óte mańyzdy. Árıne, bolashaqta men PPV-jekpe-jek ótkizýge múddelimin» - dedi Golovkın.
Aıta ketelik, Pay-Per-View - (PPV) - uǵymy tikeleı aýdarǵanda «kórgeniń úshin tóle» - degen maǵynany bildiredi. Bul sporttyq jáne basqa da mańyzdy sharalardy búkil álem boıynsha kabeldik jáne spýtnıktik telearnalar arqyly aqyly translıatsııalaý júıesi. Onda jarnama bolmaıdy jáne atalmysh shara tolyǵymen kórsetiledi.
