Gennadıı Golovkın Mońǵolııa UOK basshysymen kezdesti

ASTANA. KAZINFORM – Sıngapýrda ótip jatqan sý sport túrleri boıynsha álem chempıonaty aıasynda Qazaqstan Ulttyq Olımpıadalyq komıtetiniń prezıdenti Gennadıı Golovkın men Mońǵolııa Ulttyq Olımpıadalyq komıtetiniń basshysy Batýshıg Batboldtyń jumys kezdesýi ótti.

Aıta keteıik, Batýshıg Batbold - Halyqaralyq Olımpıadalyq komıtetiniń (HOK) múshesi jáne Azııa Olımpıadalyq keńesiniń (AOK) mádenıet jáne bilim jónindegi komıssııasynyń tóraǵasy.

QR UOK málimetinshe, Sıngapýrdaǵy kezdesýde taraptar eki eldiń Olımpıadalyq komıtetteri arasyndaǵy yntymaqtastyqty damytýǵa qatysty birqatar máseleni talqylady. Atap aıtqanda, birlesken jarystar ótkizý, sportshylardy daıyndaýda kásibı tájirıbe almasý, sondaı-aq Olımpıadalyq qozǵalys aıasyndaǵy bilim berý bastamalaryn júzege asyrý arqyly ekijaqty seriktestikti tereńdetý múmkindikteri qarastyryldy.

Mońǵolııa tarapy bıylǵy qyrkúıek aıynda Qazaqstanǵa saparmen kelýge qyzyǵýshylyq bildirdi. Jospar boıynsha delegatsııa Almaty jáne Astana qalalaryndaǵy negizgi sporttyq nysandardy aralap, aldaǵy ýaqytta Mońǵolııada osyndaı keshenderdi salý kezinde qazaqstandyq tájirıbeni qoldanýdy kózdep otyr.

Kezdesý sońynda taraptar Olımpıadalyq qozǵalystyń ortaq qundylyqtaryn ilgeriletý, halyqaralyq yntymaqtastyqty nyǵaıtý jáne sporttyq ınfraqurylymdy damytýǵa baǵyttalǵan jobalardy birlesip júzege asyrý úshin seriktestikti jalǵastyrýǵa nıetti ekenin rastady.

Aıta keteıik, jelide Golovkınniń bir top jasóspirimdi qýantqan sáttegi beınejazba taraǵan edi.