Gennadıı Golovkın men Erbol Myrzabosynov qysqy Azııa oıyndaryndaǵy sportshylarmen kezdesti
ASTANA.KAZINFORM - Qazaqstan Ulttyq Olımpıadalyq komıtetiniń prezıdenti Gennadıı Golovkın men Qazaqstan Týrızm jáne sport mınıstri Erbol Myrzabosynov 2025 jylǵy Harbındegi qysqy Azııa oıyndarynda óner kórsetip jatqan Qazaqstan quramasymen kezdesti, dep habarlady Ulttyq olımpıadalyq komıtet.
UOK tóraǵasy men Týrızm jáne sport mınıstri sportshylardy alǵashqy jeńip alǵan medaldarymen quttyqtap, aldaǵy jarystarda sáttilik tiledi.
- Búgin jeńis tuǵyryna shyqqan sportshylarymyzdy quttyqtaımyn. Sizderdiń búgingi jetistikterińiz – eńbek, shydamdylyq pen sportqa degen adaldyqtyń nátıjesi. Sizdermen birge osynda bolǵanyma qýanyshtymyn jáne Azııa oıyndarynda óner kórsetý, elimizdi osyndaı iri sporttyq sharada tanytý sizder úshin qanshalyqty mańyzdy ári jaýapty ekenin túsinemin. Árqaısyńyz jalpy jetistikke óz úlesterińizdi qosyp otyrsyzdar. Biz sizderdiń jarystarda kórsetken janqııarlyq eńbekterińizdi baǵalaımyz. Barlyqtaryńyzǵa jarqyn jeńister men jańa jetistikter tileımin, - dedi Gennadıı Golovkın.
Eske salsaq, 2025 jylǵy IX qysqy Azııa oıyndary 7-14 aqpan aralyǵynda Harbınde ótip jatyr.
Búgingi tańda Qazaqstan quramasynyń qorjynyna úsh kúmis medal tústi.
Short-trekshiler komandasy 2000 metrlik aralas estafetada kúmis medal jeńip alsa, konkımen júgirýshi Evgenıı Koshkın 100 metrlik qashyqtyqta kúmis júldeger atandy. Shańǵy jarysynda Konstantın Bortsov sprıntte ekinshi oryn alyp, kúmis medal ıelendi.