Gennadıı Golovkın men Erbol Myrzabosynov Halyqaralyq konkıshiler odaǵynyń prezıdentimen kezdesti
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın men QR Týrızm jáne sport mınıstri Erbol Myrzabosynov Qytaıdyń Harbın qalasynda ótip jatqan 2025 jylǵy Qysqy Azııa oıyndarynda Halyqaralyq konkıshiler odaǵynyń (ISU) prezıdenti Kım Chje Elmen kezdesý ótkizdi.

Ulttyq Olımpıadalyq komıtettiń málimetinshe, kezdesý barysynda Qazaqstandaǵy konkı sport túrleriniń damýy, ISU-men yntymaqtastyqty nyǵaıtý jáne ony keńeıtý máseleleri talqylandy.

ISU prezıdenti Kım Chje El Qazaqstandaǵy konkımen júgirý sportynyń tanymaldylyǵynyń qarqyndy ósýin joǵary baǵalap, halyqaralyq jarystardy ótkizý úshin elimizdiń sporttyq ınfraqurylymyn paıdalanýǵa qyzyǵýshylyq tanytty.
- Mánerlep syrǵanaý, short-trek jáne konkımen júgirý sporty Qazaqstanda qarqyndy damyp keledi jáne bizdiń sportshylarymyz joǵary nátıjeler kórsetip jatyr. Búgingi kúni short-trekten estafetada jáne konkımen júgirýden 100 metrlik qashyqtyqta kúmis medaldar jeńip alyndy, bul olardyń joǵary kásibıligin kórsetedi. Biz ISU-men uzaq merzimdi yntymaqtastyqqa qyzyǵýshylyq tanytyp otyrmyz, sebebi álem chempıonattaryn ótkizý úshin bizdiń qabiletterimiz ben múmkindikterimiz jetkilikti, - dedi Qazaqstan Ulttyq Olımpıadalyq komıtetiniń basshysy.
Kezdesý barysynda taraptar Qazaqstannyń Azııada konkımen júgirý sporty men short-trekti damytýdaǵy rólin, sondaı-aq ISU-men yntymaqtastyqty nyǵaıtý arqyly qysqy sport túrleriniń halyqaralyq arenada ornyqty bolýyn talqylady. Qazaqstandyq delegatsııa ISU basshylyǵyn elimizge resmı saparmen kelýge shaqyrdy.
Aıta keteıik, Qazaqstan sportshylarynyń Azııa oıyndarynda 10 aqpandaǵy jarys kestesi jarııalandy.