Gennadıı Golovkın: Men endi Mıgel Kottomen judyryqtasqym keledi
ALMATY. QazAqparat - Orta salmaqta WBA (sýper) nusqasy boıynsha álem chempıony Qazaqstandyq bylǵary qolǵap sheberi Gennadıı Golovkın búgin Nıý-Iork (AQSh) qalasynyń ataqty «Medıson Skver Garden» arenasynda óziniń otyzynshy jeńisine qol jetkizgen bolatyn. Úshinshi raýndta-aq Gennadııdiń oń qaptaldan soqqan soqqysy avstralııalyqtyń úmitin úzdi. Ornynan áýpirimdep áreń turǵan Gıl jekpe-jekti odan ári jalǵastyrýdan bas tartty.
Gennadıı Golovkın osy kezdesýden keıin ile-shala amerıkalyq telearnalardyń birine bergen suhbatynda tez jeńiske jetkenine qaramastan Danıel Gılge syılastyqpen qaraıtyndyǵyn málim etti, dep habarlaıdy sports.kz portaly. Sonymen qatar, osy suhbat barysynda qazaqstandyq boksshy endi aldaǵy ýaqytta naqty qaı boksshymen qolǵap túıistirgisi keletindigin ashyq málimdedi.
- Gennadıı, kásibı rıngtegi otyzynshy jeńisińiz qutty bolsyn! Budan basqa Siz, osymen 27-shi kezdesýińizdi nokaýtpen jeńdińiz. Jalpy, osy nokaýt Siz úshin qandaı mánge ıe? Siz úshin nokaýtpen jeńý mańyzdy boldy ma?
- Quttyqtaǵanyńyzǵa rahmet! Árıne, jeńiske jetkenime sóz joq qýanyshtymyn. Jeńisimmen qatar bul nokaýt ta men úshin óte mańyzdy. Ol meniń komandam úshin, jankúıerlerim úshin, Otanym úshin de mańyzdy. Bul -men arman etken eleýli jetistik. Sol úshin oǵan qol jetkizgenime óte qýanyshtymyn!
- Jekpe-jek barysynda Sizge balanyń qolynan kámpıtin tartyp alý qıynyraq bolatyn sııaqty bolyp kórindi...
- Olaı tym kesip-piship aıtpaıyqshy, ótinem! Danıel Gıl - tamasha bokser jáne sportshy. Men ony bokstaǵy jetken jetistikteri úshin qatty syılaımyn. Osy kezdesýde bolǵan jaǵdaı ony búıtip qorlaýǵa nemese biliktilgine, sheberligine kúmán keltirýge negiz bola almaıdy!
- Osy kezdesýde Siz qandaı da bir arnaıy strategııalyq jospar ázirlep pe edińiz? Stılińizge qandaı da bir ózgertýler engizdińiz be?
- Maǵan ózgertý engizýdiń qajeti joq. Men rıngke óz stılimde shyǵyp judyryqtasamyn. Tek óz stılimdi ustanýǵa tyrysamyn. Bul, minekı, óz jemisin berip jatyr. Men qashanda óz óz stılimde bokstasyp kelemin, budan keıin de osylaı bokstasa bermekpin. Sondyqtan ózgertý engizýdiń eshqandaı qajeti joq.
- Siz óz stılińizdi qalaı sıpattar edińiz? - Meksıkalyq shyǵar dep oılaımyn. Maǵan agressııalyq, shabýyldyq sıpatta judyryqtasqan unaıdy. Aıyzym qanyp judyryqtasamyn. Men budan rahat alamyn.
- «Medıson Skver garden» arenasyndaǵy debıýtińiz unady ma? - Maǵan barlyǵy unady. Ózimniń kezekti jekpe-jegimdi osy jerde ótkizgenime tóbem kókke jetkendeı qýanyshtymyn. Osy sátti paıdalanyp, búgingi kezdesýdi kórýge kelgen barlyq kórermenderge rızashylyǵymdy bildirgim keledi! Búgingi jekpe-jek te olarǵa unady degen úmittemin. Men qashanda kórermen úshin judyryqtasamyn jáne sondyqtan olarǵa ádemi jáne qashanda qyzyqty, shıelenisti boks syılaýǵa tyrysamyn!
- Kelesi qarsylasyńyzdyń kim bolǵanyn qalar edińiz? - Meniń dıvızıonymda áli de myqty boksshylar kóp. Olar meniń telefon nómirimdi biledi. Ony olardyń agentteri de biledi. Meniń baılanys nómirim telearnashylarǵa da belgili. Eger alǵashqylary menen qoryqpaıtyn bolsa, al ekinshileri taǵy bir qyzyqty kórsetilimdi kórgileri kelse, onda habarlassyn, qatelespeıdi.
- Sonda da bolsa, famılııasyn atańyzshy! Siz jaýaptan taıqyp jatyrsyz. Suraqty tótesinen qoıaıynshy: Gennadıı Golvokın endi kimmen judyryqtasqysy keledi?
- Men budan keıin de biriktirýshi jekpe-jekterdi qalaıtynymdy taǵy da aıtqym keledi. Biz osy salmaqta tek osylaısha eń myqty boksshyny anyqtaı alamyz. Al onyń kim bolatyny - ol basqa áńgime. Men Pıter Kýıllın jáne Mıgel Kotto sekildi boksshylardy ataı alamyn.
- Eger de tańdaý tek Sizdiń qolyńyzda bolsa, onda kimdi tańdar edińiz?
- Mıgel Kottony. Menińshe, bul kórermender úshin de, telearnalar úshin de keremet kezdesý bolar edi. Al bizge ózara judyryqtasý ári aramyzdan eń úzdik boksshyny anyqtaý qyzyqty bolar edi.
