Gennadıı Golovkın: Men basqa salmaqqa tek PPV jekpe-jekter úshin ǵana ótemin
ALMATY. QazAqparat - Orta salmaqta WBA (sýper) nusqasy boıynsha álem chempıony qazaqstandyq bylǵary qolǵap sheberi Gennadıı Golovkın óz salmaǵynda, ıaǵnı 72,58 keli (160 fýnt) salmaq dárejesinde basqa ataqtardy biriktirýdi kózdeıtindigin jáne tek PPV jekpe-jekter bolsa ǵana birinshi orta salmaqqa túsýge nemese ekinshi orta salmaqqa kóterilýge daıyn ekendigin jetkizdi.
«Dál qazir meniń kózdegenim tek 160 fýnttyq salmaq dárejesi. Biraq men kez-kelgen aýqymdy PPV jekpe-jekterge daıynmyn. ıAǵnı, shyn mánisinde mańyzdy kezdesýler bolatyn bolsa, onda 168 (76,2 kg) nemese 154 fýnttyq (69,85 kg) salmaq dárejesine ótýge kelisemin. Biraq dál qazir óz salmaǵymda qalamyn jáne osy salmaqta basqa kez-kelgen qarsylaspen qolǵap túıistirýge daıynmyn», - dedi Gennadıı Golovkın BoxingScene portalyna bergen suhbatynda.
Aıta ketelik, Pay-Per-View (PPV) uǵymy tikeleı aýdarǵanda «kórgeniń úshin tóle» degen maǵynany bildiredi. Bul sporttyq jáne basqa da mańyzdy sharalardy búkil álem boıynsha kabeldik jáne spýtnıktik telearnalar arqyly aqyly translıatsııalaý júıesi. Onda jarnama bolmaıdy jáne atalmysh shara tolyǵymen kórsetiledi, dep jazady sports.kz.
