Gennadıı Golovkın: Kishi-Chavespen jekpe-jekke shyǵýǵa daıynmyn
ASTANA. QazAqparat – WBA (Super) jáne IBO nusqalary boıynsha orta salmaqtaǵy álem chempıony, jerlesimiz Gennadıı Golovkın óz salmaǵyndaǵy eks-chempıon Kishi-Hýlıo Sezar Chavespen rıngte kezdeskisi keledi.
Chempıon Gennadıı bul týraly 27 shildedegi matchynan keıin ótken baspasóz máslıhatynda málimdedi, dep habarlaıdy Allboxing.ru. saıty.
«Men Chavespen rıngte kezdesýge daıynmyn. Men onymen judyryqtasqym keledi. Onymen kezdesýge qumarmyn», - dedi Gennadıı Golovkın baspasóz máslıhatynda. Toqtala ketetin jaıt, buǵan deıin, naqtylaı aıtqanda aǵymdaǵy jyldyń kókteminde Golovkın-Chaves kezdesýi boıynsha belsendi túrde kelissózder júrgizilgen bolatyn. Alaıda, keıinnen meksıkalyq boksshynyń komandasy Top Rank promoýteri usynǵan qarjylyq sharttarǵa kóńilderi tolmaıtynyn alǵa tartyp, kezdesýden bas tartqan edi.
Esterińizge sala keteıik, 27 shildede bokstan orta salmaq dárejesinde WBA (Super) men IBO boıynsha álem chempıony qazaqstandyq Gennadıı Golovkın avstralııalyq boksshy Denıel Gıldi 3-raýndta-aq sulatyp salǵan bolatyn. Atalmysh kezdesý Nıý-Iorktegi 20 myń adam sııatyn Madison Square Garden arenasynda ótti jáne jekpe-jekti HBO telearnasy arqyly 100-den astam eldiń kórermenderi tamashalady. Bul Gennadııdiń kásipqoı bokstaǵy 30-shy kezdesýi bolyp, ol WBA chempıony tıtýlyn 11-shi ret qorǵady. Aıta keteıik, qazaqstandyq boksshy 30 kezdesýdiń 27-sin nokaýtpen aıaqtady. Bunyń aldynda habarlaǵanymyzdaı, Gennadıı Golovkın kelesi jekpe-jegin qazan nemese qarasha aıyna ótkizýdi josparlaýda.
