Gennadıı Golovkın qazaqstandyqtardy Táýelsizdik kúnimen quttyqtady

NUR-SULTAN. QazAqparat – Qazaqstandyq kásipqoı boksshy, orta salmaqtaǵy IBF jáne IBO tujyrymdary boıynsha álem chempıony Gennadıı Golovkın (40-1-1, 35 KO) otandastaryn Táýelsizdik kúnimen quttyqtady, dep habarlaıdy QazAqparat tilshisi.

Quttyqtaýdy boksshy Facebook-paraqshasynda vıdeo retinde jarııalady. Vıdeoda boksshynyń Qazaqstannyń Memlekettik Týyn jelbiretip, sharshy alańǵa shyqqan sátteri kórsetilgen.

Qazaqstan Respýblıkasy óz táýelsizdigin jarııalap, derbes memleket atanǵanyna búgin 29 jyl tolyp otyr. Qazaqstan táýelsizdik alǵaly beri halyq yntymaqtasyp, jalpyulttyq, ultaralyq birlikti nyǵaıtýǵa, rýhanı-mádenı jańǵyrýǵa bet burdy. Qysqa merzimde Táýelsiz Respýblıkamyz sovet ımperııasynan mura bolyp qalǵan kóptegen ótkir de ózekti máselelerdiń sheshimin taýyp, saıası, ekonomıkalyq jáne áleýmettik-mádenı salalarǵa da reformalar júrgizildi. Búgin de Qazaqstan ekonomıkasy damyǵan, birneshe halyqaralyq uıymdardyń múshesi, álemdik sahnada ózindik yqpaly bar memleketke aınaldy.