Gennadıı Golovkın Qatar UOK basshysymen kezdesý ótkizdi

ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Qatar UOK basshysy, Ulttyq olımpıadalyq komıtetter qaýymdastyǵynyń vıtse-prezıdenti sheıh Djoan bın Hamad bın Halıfa Ál-Tanımen resmı kezdesý ótkizdi. Bul týraly UOK habarlady. 

Astanadaǵy resmı is-sharaǵa Azııa Olımpıadalyq keńesiniń bas dırektory jáne World Aquatics uıymynyń prezıdenti Hýseın ál-Mýsallam, QR Týrızm jáne sport mınıstri Erbol Myrzabosynov, Qazaqstan UOK bas hatshysy Álimjan Aqaev jáne Qazaqstan sý sporty túrleri federatsııasynyń prezıdenti Nurlan Jaqypov ta qatysty.

Kezdesý barysynda Azııa Olımpıadalyq keńesi men Qazaqstan arasyndaǵy yntymaqtastyq, olımpıadalyq qozǵalysty damytý jáne birlesken jobalardy júzege asyrý máseleleri, onyń ishinde bıyl Astanada ótetin Qurlyqtyq sportshylar forýmyn uıymdastyrý jaıy talqylandy.

Atalmysh forýmǵa Azııanyń 45 elinen sporttyq komıssııalardyń ókilderi, sondaı-aq Halyqaralyq Olımpıadalyq komıteti (HOK) men Azııa Olımpıadalyq keńesiniń jetekshileri qatysady dep josparlanyp otyr.

Taraptar Qazaqstan men Qatar UOK arasyndaǵy áriptestikti keńeıtýge jáne World Aquatics uıymynyń Qazaqstan sý sporty túrleri federatsııasymen yntymaqtastyǵyn nyǵaıtýǵa basa nazar aýdardy.

Kezdesý qorytyndysy boıynsha taraptar halyqaralyq sporttyq yntymaqtastyqty damytýǵa qyzyǵýshylyǵyn bildirip, josparlanǵan bastamalardy júzege asyrý boıynsha aldaǵy naqty qadamdardy kelisip aldy.