Gennadıı Golovkın Qaraǵandyda Búkilálemdik boks qaýymdastyǵynyń orta salmaqtaǵy Álem chempıony ataǵyn qorǵaıdy
MATY. 11 qazan. QazAqparat /Erlik Erjanuly/ - Búkilálemdik boks qaýymdastyǵynyń (WBA) orta salmaqtaǵy Álem chempıony Gennadıı Golovkın QR Táýelsizdiginiń 20 jyldyǵy qarsańynda qaraǵandylyqtarǵa úlken syı jasamaq.
Ol 12 qarasha kúni ózi týyp-ósken qalanyń sport kesheninde amerıkandyq Lajýan Sımonmen (Lajuan Simon) jekpe-jek ótkizedi.
Chempıondyqtan úmitker L. Sımon 1979 jyly 25 aqpanda dúnıege kelgen bolatyn. Alǵashqy jekpe-jegin 2002 jyly 7 qyrkúıekte AQSh-tyń Pensılvanııa shtatyndaǵy Býshhıl qalasynda ótkizgen. Onda qorjynynda 1 jeńis, 1 jeńilisi bar Kıran Hılldan mereıin asyrǵan ol buǵan deıin 29 kezdesý ótkizip, onyń 23-inde (12-si nokaýtpen) jeńip, úsheýinde jeńilis taýyp, ekeýinde teń túsken. Bul boksshy 2010 jyly 3 jeltoqsandaǵy sońǵy kezdesýinde AQSh-tyń Delaýare (Delaware) shtatynyń Dover qalasynda Dıonısıo Mırandaǵa ( Dionisio Miranda) 115:114, 113:115, | 112:115 esebimen ese jibergen bolatyn. Al 1982 jyly 8 sáýirde Qaraǵandyda ómirge kelgen Gennadıı Golovkın buǵan deıin 21 kezdesý ótkizip, onyń bárinde de (18-i nokaýtpen) jeńiske jetken bolatyn. Kásipqoı boks rıngindegi alǵashqy jekpe-jegin 2006 jyly 6 mamyrda Germanııadaǵy Nordrheın-Ýestfalende (Nordrhein-Westfalen) ótkizip, Gabor Valoghty (Gabor Balogh) nokaýtpen utqan edi. 20009 jyly 11 maýsymda Germanııada John Anderson Karvalhomen (John Anderson Carvalho) bolǵan saıysta Búkilálemdik boks qaýymdastyǵynyń Qurlyqaralyq chempıony ataǵyn jeńip alǵan Genadıı 2010 jyly 14 tamyzda Panamada Mılton Nýnezben ( Milton Nunez) bolǵan kezdesýde Álem chempıony beldeýin beline taqqan bolatyn. Odan keıin Gennadıı 2010 jyly 16 jeltoqsanda Astanada Nılson Jýlıo Tapıany (Nilson Julio Tapia), al 2011 jyly 17 maýsymda Panamada Kassım Oýmany (Kassim Ouma) nokaýtpen utyp óz ataǵyn sátti qorǵap shyqqan edi.
