Gennadıı Golovkın Qaraǵandy oblysynyń ákimimen kezdesti

QARAǴANDY. QazAqparat – Ataqty boksshy men aımaq basshysy Qaraǵandy qalasyndaǵy, dálirek aıtsaq, Gennadııdiń balalyq shaǵy ótken «Maıqudyq» shaǵynaýdanyndaǵy sport nysandaryn qalpyna keltirý máselesin talqylady, dep habarlaıdy QazAqparat tilshisi.

«Gennadıı Golovkınmen kezdesip, Nıý-Iorktegi jeńisimen quttyqtaýǵa múmkindik týdy. Birge otyryp Qaraǵandy oblysynyń sport salasynyń damýyn talqyladyq. Gennadıı erekshe jylylyqpen jáne qamqorlyqpen «Maıqudyqtyń» sport ınfraqurylymy týraly surady. Kelesi jyly ataqty «Lıteışık» stadıonyn qalpyna keltirýmen aınalysamyz jáne Magnıtogorskaıa kóshesin tolyq jóndeýden ótkizemiz dep ýáde berdim», - dep jazdy oblys ákimi Facebook paraqshasynda.

«Lıteışık» stadıony Maıqudyq yqshamaýdanynda ornalasqan. 70-80 jyldary ol qalanyń tanymal sport nysandarynyń biri boldy. Munda 1979 jáne 1980 jyldardaǵy Qaraǵandy oblysynyń chempıony, 1980 jylǵy Qazsovprof kýbogynyń ıegeri atanǵan «Lıteışık» zaýytynyń fýtbol komandasy oınaǵan bolatyn.