Gennadıı Golovkın HOK basshysy Tomas Bahpen kezdesti
ASTANA. KAZINFORM – Búgin Lozannada Qazaqstan Ulttyq olımpıadalyq komıtetiniń Halyqaralyq Olımpıada komıtetine resmı is-sapary aıasynda Gennadıı Golovkın HOK basshysy Tomas Bahpen ózekti taqyryptardy talqylady.
QR Ulttyq olımpıadalyq komıtetiniń baspasóz qyzmeti málim etkendeı, Olımpıada úıindegi eki kúndik tyǵyz baǵdarlamanyń basty oqıǵasy Qazaqstan UOK prezıdenti Gennadıı Golovkınniń HOK basshysy Tomas Bahpen kezdesýi boldy.
Atalǵan jaǵdaı qazaqstandyq sport qoǵamdastyǵy úshin mańyzdy is-sharalardyń biri boldy. Sondaı-aq bul UOK-tiń halyqaralyq olımpıadalyq qozǵalysqa belsendi aralasýǵa umtylǵanyn kórsetedi. Kezdesý Qazaqstan men HOK arasyndaǵy áriptestikti nyǵaıtýda mańyzdy qadam sanalyp otyr.
Bah áńgime aıasynda UOK prezıdenti Gennadıı Golovkındi jaýapty qyzmetke saılanýymen quttyqtap, Qazaqstan Ulttyq olımpıadalyq komıtettiń jańa basshylyǵyna HOK tarapynan qoldaý kórsetetinin jetkizdi. UOK basshysy óz kezeginde jańarǵan komandanyń basty basymdyqtaryna nazar aýdaryp, halyqaralyq áriptestik pen atletterdi qoldaý baǵdarlamalaryna erekshe toqtalyp ótti.
Óz kezeginde Gennadıı Gennadevıch UOK-tiń Halyqaralyq Olımpıada komıtetine senimdi seriktes bolyp qalatynyn jáne uıymnyń barlyq bastamalaryn, onyń ishinde, sportshylar quqyǵyn qorǵaýǵa arnalǵan usynystardy árdaıym qoldaıtynyn aıtty.
Taraptar olımpıadalyq kún tártibindegi mańyzdy máselelerdi jáne olımpıadalyq qozǵalysty damytý jumystaryn, onyń ishinde, qozǵalysty Ortalyq Azııa aımaǵynda ilgeriletý týraly saýaldardy talqylady.
Kezdesýden soń HOK basshysy Gennadıı Golovkındi uıymnyń shtab-páterine kelgen áıgili atletter qoltańba qaldyratyn olımpıadashylar qabyrǵasyna qol qoıýǵa shaqyrdy.
«Halyqaralyq Olımpıada komıteti men arnaıy Tomas Bah myrzaǵa bizge shaqyrtý jiberip, jyly qarsy alǵany úshin barsha komandamyzdyń atynan alǵys aıtamyn. Bul kezdesý ortaq maqsat jolynda birikken eki uıym arasyndaǵy berik ári senimdi áriptestiktiń bastaýy bolaryna kúmánim joq», - dep atap ótti Gennadıı Golovkın.
Aıta ketelik, kezdesý HOK dırektory Djeıms Maklodtyń, HOK-tiń UOK-termen qarym-qatynas jónindegi dırektorynyń orynbasary Olvıe Nıamkanyń jáne Qazaqstan UOK bas hatshysy Janar Ýteshevanyń qatysýymen ótti. Eki uıym basshysy kelesi kezdesýdi 2024 jylǵy Parıj Olımpıadasynda ótkizemiz dep kelisti.
22-23 mamyr kúnderi Lozannada ótken is-sapar barysynda UOK delegatsııasy HOK qyzmeti jáne Departamentteri basshylarymen birqatar kezdesý ótkizip, eki uıym qarym-qatynasyna baılanysty mańyzdy saýaldar men máselelerdi tereńinen talqylady.
Esterińizge sala keteıik, bıylǵy jyldyń basty dodasy Parıj olımpıadasy shildeniń 26-y men tamyzdyń 11-i aralyǵynda ótedi.
