Gennadıı Golovkın Halyqaralyq boks federatsııasynyń olımpıadalyq komıssııasyn basqarady
ASTANA. KAZINFORM — Qazaqstan Ulttyq olımpıada komıtetiniń prezıdenti Gennadıı Golovkın Halyqaralyq boks federatsııasy (World Boxing) jańa Olımpıada komıssııasynyń tóraǵasy atandy.
QR Ulttyq olımpıada komıtetiniń baspasóz qyzmeti málim etkendeı, jumys barysynda Qazaqstan UOK basshysy World Boxing qyzmetiniń ashyqtyǵyn qamtamasyz etý máselelerine qatysty halyqaralyq sporttyq uıymdarmen birlese jumys isteýge kóńil bóledi.
Sonymen qatar, onyń komıssııa basshysy retindegi basty mindetteriniń biri — boksty Olımpıada oıyndarynyń baǵdarlamasynda qaldyryp, World Boxing uıymyn HOK moıyndaýy úshin Halyqaralyq Olımpıada komıtetimen tyǵyz áriptestik ornatý bolmaq.
«Jeke ózim úshin, Qazaqstan úshin jáne barsha sport álemi úshin boksty olımpıadalyq sport túri retinde saqtap qalý mańyzdy jáne bul meniń jumysymdaǵy eń basty basymdyq bolmaq. Sondaı-aq, boks olımpıadalyq qundylyqtarǵa saı, ádil ári ashyq bolýy úshin Halyqaralyq Olımpıada komıtetimen tyǵyz áriptestik ornatýdy kózdep otyrmyn. Meniń kásibı sportshy retinde jıǵan tájirıbem World Boxing jumysyn bir júıege keltirerine senemin jáne kúshimizdi biriktire otyryp, bokstyń damýyna jańa serpin bere alamyz. Biraq alda biz atqaratyn jumys kóp», — dep atap ótti Gennadıı Golovkın.
World Boxing prezıdenti Borıs van der Vorsttyń aıtýynsha, Gennadıı Golovkınmen áriptestik ornatý uıymnyń alǵa qoıǵan maqsattaryn tıimdi oryndaýǵa jol ashady.
«Olımpıadalyq boksta da, kásibı boksta da sátti óner kórsetken adam retinde ol boksty olımpıadalyq qozǵalysta qaldyrýdyń bul sport túriniń ári qaraı damýy úshin asa mańyzdy ekenin jaqsy túsinedi. Bul áýesqoı boks úshin de, kásibı boks úshin de qajet. Boksty olımpıadalyq sport túrleri qatarynda qaldyryp, atalǵan sport túrin damytýdaǵy ortaq mıssııalarymyzdy oryndaý úshin onymen birlese jumys isteıtin múmkindikti asyǵa kútemin», — dep pikir bildirdi Borıs van der Vorst.
Aıta ketelik, World Boxing Gennadıı Golovkınniń kandıdatýrasyn alǵashqylardyń biri bolyp bekitti.
Jaqyn arada Olımpıada komıssııasy quramyna sport áleminiń ózge de ókilderi enip, boksty Olımpıadalyq qozǵalys ortasynda qaldyrýǵa arnalǵan iri josparlardy júzege asyrýǵa kúsh salady.
Aıta keteıik, World Boxing — Halyqaralyq boks federatsııasy. Uıym 2023 jyldyń sáýirinde quryldy. Qazirgi tańda uıym quramyna álemniń 44 memleketindegi Ulttyq federatsııalar engen.
