Gennadıı Golovkın Frantsııada kásipqoı bokstyń ІVO jáne WBA nusqalary boıynsha chempıondyq ataqtaryn qorǵaıdy
ALMATY. 31 qańtar. QazAqparat - Orta salmaqtaǵy qazaqstandyq bylǵary qolǵap sheberi Gennadıı Golovkın kásipqoı bokstaǵy 26-shy jekpe-jegin ótkizedi. Kásipqoı boks saıttarynyń habarlaýynsha, kezdesý 30 naýryzda Frantsııada ótpek.
8 sáýirde 30-ǵa tolatyn G.Golovkınniń bul jolǵy qarsylasy 33 jasar Gana azamaty Osýman Adam bolǵaly otyr. Buǵan deıin 19 qańtarda AQSh-ta amerıkandyq Gabrıel Rosadony 7-shi raýndta tehnıkalyq nokaýtpen utqan Gennadıı Halyqaralyq boks uıymynyń (ІVO) chempıony ataǵyn tórtinshi, al Búkilálemdik boks qaýymdastyǵynyń (WBA) Álem chempıony ataǵyn 7-shi ret qorǵamaq. Qazaqstandyq boksshy 25 kezdesýde túgel jeńiske jetken bolatyn.
Gana elinde 1980 jyly 24 jeltoqsanda ómirge kelgen Osýman Adam bolsa buǵan deıin 23 kezdesý ótkizip, onyń 20-synda (15-in nokaýtpen) jeńip, úsheýinde (bireýinde nokatpen) jeńilis tapqan bolatyn. Kásipqoı bokstaǵy alǵashqy jekpe-jegin 2011 jyly 25 mamyrda ótkizgen ol, 30 qarashadaǵy úshinshi kezdesýinde bos turǵan Gana chempıony ataǵyn, 2012 jyly 8 aqpandaǵy 4-shi kezdesýinde bos turǵan West African Union chempıony ataǵyn jeńip aldy. Olardy 2 ret qorǵaǵan soń, 2004 jyldyń 30 shildesinen bos turǵan Búkiálemdik boks uıymynyń (WBO) Afrıka chempıony ataǵyn ıelendi. Odan keıin AQSh-ta reıtıngtik jekpe-jekterde 2009 jyly 21 tamyzdaǵy 14-shi kezdesýinde Dıah Davıske, 2010 jyly 30 sáýirdegi 19-shy kezdesýinde Don Georgıge jeńildi. 17 jeltoqsandaǵy 20-shy kezdesýinde bos turǵan Halyqaralyq boks uıymynyń halyqaralyq chempıony, 2011 jyly 25 naýryzda 22-shi kezdesýde bos turǵan Halyqaralyq boks uıymynyń Qurlyqaralyq jáne USBA chempıony ataǵyn jeńip aldy. Al 2012 jyly 7 naýryzdaǵy Halyqaralyq boks federatsııasynyń chempıony ataǵy úshin bolǵan sońǵy jekpe-jeginde Avstralııada Danıel Gealıden jeńilis tapqan bolatyn.
