Gennadıı Golovkın elordada stýdenttermen kezdesti
ASTANA. KAZINFORM – Qazaqstan Ulttyq olımpıada komıtetiniń prezıdenti Gennadıı Golovkın Astana qalasynda oqıtyn stýdenttermen kezdesý ótkizdi.
2004 jylǵy Olımpıadanyń kúmis júldegeri stýdenttermen óziniń ómirlik qaǵıdalarymen bólisip, sporttaǵy jetistik jolyn baıandap, jas urpaqqa qundy keńester berdi.
Áńgime barysynda Golovkın jastyq shaǵyn, sporttaǵy alǵashqy qadamdaryn jáne mansabynda ne nárse jigerlendirgenin eske aldy. Ol tabysqa jetýde basty róldi maqsatqa umtylys, tártip pen durys orta atqarǵanyn erekshe atap ótti.
Kezdesýde qatysýshylar Golovkınniń kásibı mansabynan bólek, onyń ómirge degen kózqarasyna da qyzyǵýshylyq tanytty. Qazaqstan UOK basshysy qorqynyshtardy jeńý joldary, ómirde durys basymdyqtardy anyqtaý jáne mańyzdy nárseni paıdasyz zattardan ajyrata bilý týraly oılarymen bólisti.
— Elimizde belsendi, ambıtsııasy joǵary jastardyń kóp ekeni qýantady. Sizdermen kezdesip, tájirıbemmen bólisýge jáne bastamalaryńyzdy qoldaýǵa múmkindik alǵanyma rızamyn.
Sizderge aıtarym — qıyndyqtardan qoryqpańyzdar, batyl maqsattar qoıyp, solarǵa nyq senimmen umtylyńyzdar. Armandaryńyz úshin aıanbaı eńbek etińizder, ózderińizge senińizder jáne eshqashan toqtamańyzdar. Naǵyz jetistik — ózińniń múmkindikterińniń shegine jetip, tulǵaǵa aınalǵanyńdy seziný, - dep Golovkın stýdentterge úndeý jasady.
Odan bólek, ol Qazaqstan UOK prezıdenti retindegi jumysy týraly da aıtty.
— Meniń qyzmetim, eń aldymen túrli sporttyq uıymdarmen halyqaralyq yntymaqtastyqty damytýǵa, sondaı-aq Qazaqstannyń álemdik sport arenasyndaǵy bedelin arttyrýǵa jáne tanymaldylyǵyn nyǵaıtýǵa baǵyttalǵan, - dedi Qazaqstan UOK basshysy.
Aıta keteıik, kezdesýler ashyq dáris formatynda ótti jáne stýdentter úlken qyzyǵýshylyq tanytty. Qatysýshylardyń aıtýynsha, bul mazmundy áńgime olardyń bolashaqqa baǵdar alýyna septigin tıgizbek.
Buǵan deıin búgin bokstan «Strandja» týrnırinde el quramasynan kimder synǵa túsetinin jazǵan edik.