Gennadıı Golovkın Derevıanchenkony nokaýtpen jeńetinin aıtty

NUR-SULTAN. QazAqparat – Orta salmaqtaǵy burynǵy álem chempıony Gennadıı Golovkın 5 qazandaǵy jekpe-jekte qarsylasy, ýkraınalyq Sergeı Derevıanchenkony nokaýtqa jiberý úshin baryn salatynyn aıtty, dep habarlaıdy Sports.kz.

«Men óz stılimdi saqtap qalǵym keledi. Ol — big drama show. Eger ol maǵan birinshi nemese ekinshi raýndtqa qandaı da bir múmkindik berse, men ony nokaýtpen jeńemin. Sol sátti ótkizip almańyzdar! Qazir meniń bar ynta-yqylasym, kúsh-jigerim Derevıanchenkomen aıqasqa baǵyttalǵan. Derevıanchenkony tize búktirsem, meni keremet bolashaq kútip tur deı berińiz. Maǵan biriktirýshi jekpe-jekter, tanymal esimder kerek... Munymen toqtap qalmaımyn. Men bárine daıynmyn», - dedi Gennadıı Golovkın ashyq jattyǵýdan keıin.

Eske sala keteıik, Golovkın — Derevıanchenko boks keshi 5 qazan kúni Nıý-Iorktegi Madison Square Garden arenasynda ótedi. Sportshylar orta salmaqtaǵy IBF jáne IBO tıtýly úshin baq synaıdy.

Osy boks keshiniń anderkardynda taǵy bir qazaq boksshysy Álı Ahmedov óner kórsetedi. Onyń qarsylasy – amerıkalyq Endrıý Ernandes.

Foto: vk.com/ggolovkin