Gennadıı Golovkın DAZN uıymymen kelisimshartyn merziminen buryn buzbaq

NUR-SULTAN. QazAqparat - Boxingscene.com jýrnalısi Kıt Aıdek atap ótkendeı, orta salmaqtaǵy álem chempıony Gennadıı Golovkınniń DAZN strımıng qyzmetimen kelisim-sharty bastapqyda josparlanǵannan az ýaqytqa sozylady, dep habarlaıdy QazAqparat Sports.kz saıtyna silteme jasap.

18 qyrkúıek kúni tańerteń Gennadıı Golovkın ekinshi orta salmaqta absolıýtti chempıon ataǵy úshin Saýl «Kanelo» Alvarespen úshinshi ret judyryqtasady. Bul jekpe-jek GGG úshin DAZN-men kelisim boıynsha besinshi jáne sońǵy jekpe-jek bolady.

«Senbi kúni keshke onyń mansaby aıaqtalmaıdy, Golovkın Alvarespen úshinshi jekpe-jek onyń DAZN-men eksklıýzıvti kelisimshartyn aıaqtaıtynyn aıtty. Golovkın men DAZN 2019 jyldyń naýryz aıynda alty jekpe-jekke kelisim jasaıtyndyǵyn jarııalady, oǵan sáıkes Gennadııge 100 mıllıonnan astam AQSh dollary tólenýi kerek edi, biraq ol osy senbide strımıng qyzmetindegi besinshi shoýynan keıin aıaqtalady», - delingen.

Buǵan deıin qazaqstandyq boksshy Gennadıı Golovkın men meksıkalyq Saýl «Kanelo» Alvares arasyndaǵy úshinshi jekpe-jek Las-Vegasta ótetini habarlanǵan bolatyn. Ol 18 qyrkúıekte Nur-Sultan ýaqyty boıynsha saǵat 05:00-ge josparlanǵan, basty jekpe-jek 08:00-den keıin bastalady.

Boksshylardyń judyryq túıistirgenin Qazsport jáne Qazaqstan telearnalarynan tamashalaýǵa bolady.

Foto: sports.kz