Gennadıı Golovkın boks dańqy zalynda: AQSh-taǵy saltanatty is-sharanyń eń jarqyn sátteri

Qazaqstandyq boksshy týystaryna, jattyqtyrýshylaryna jáne mansabynda ony qoldaǵan barsha qaýymǵa alǵys bildirdi, al amerıkalyq jankúıerler qol shapalaqtap qarsy alyp, resmı rásim aıaqtalǵannan keıin de ony jibergisi kelmeı turdy, dep habarlaıdy Kazinform agenttiginiń menshikti tilshisi.

Chempıondar sherýi 

Saltanatty is-shara Dańq zalynda dástúrge aınalǵan «Chempıondar sherýinen» bastaldy.

Oǵan tek jergilikti turǵyndar ǵana emes, sonymen qatar AQSh-tyń barlyq shtattarynan kelgen boks jankúıerleri de qatysty.

Quqyq qorǵaý organdary jodardy jaýyp, qaýipsizdikti qamtamasyz etti.

Minsiz tártip jáne soqqynyń joıqyn kúshi 

Negizgi oqıǵa «Turning Stone Resort Casino» kesheninde ótti, onda basty nazarda qazaqstandyq boksshy Gennadıı Golovkın boldy.

- Biz aqyry esimi minsiz tártip pen joıqyn soqqy kúshiniń sınonımine aınalǵan, zamanymyzdyń eń úzdik orta salmaqtaǵy boksshylarynyń biri – GGG-ge qurmet kórsetip otyrmyz, - dep jarııalady júrgizýshi.

Gennadıı Golovkın jarııalanǵan kezde bylaı dep atap ótildi: «GGG álem chempıony atanbas buryn-aq turaqtylyǵy, kásibıligi jáne basqa da qasıetterimen erekshelenetin mansap qurdy. Ol Olımpıadanyń kúmis medalin jeńip alyp, rekord ornatyp, álemdegi eń úzdik áýesqoı boksshylardyń biri dep tanyldy».

- Ol tehnıkalyq dáldikti erekshe kúshpen úılestirip, nátıjesinde tarıhta orta salmaqtaǵy eń keremet chempıonat jetistikteriniń birine qol jetkizdi. Ol rıngke boks elıtasynyń ókilderine qarsy shyǵyp, jankúıerlerge ótken urpaqtardyń uly chempıondaryn eske túsiretin óner kórsetti, - dep atap ótti júrgizýshi.

Gennadıı Golovkınniń oǵan búkil álemdegi boksshylar men jankúıerlerdiń qurmetine bólegen nokaýt serııasy da eske alyndy.

- Jeńisteri men ataqtarynan bólek Gennadıı Golovkın qarapaıym ári ar-namystyń, sportqa jan-tánimen berilgendiktiń úlgisin kórsetip, bokstyń naǵyz elshisi atandy. Ol eń uly boksshylardyń qatarynda óziniń zańdy jáne laıyqty ornyn alyp otyr jáne biz ony Halyqaralyq boks dańqynyń zalynda qoshemetpen qarsy alamyz, - dep atap ótti júrgizýshi GGG-di sahnaǵa shaqyryp.

Alǵys sózder jáne jankúıerlerdiń qoshemeti

Gennadıı Golovkın óziniń jaqyndaryna, sonyń ishinde mansabynda ony qoldaǵan otbasyna, zaıybyna, balalaryna jáne aǵasyna alǵys aıtty.

- Men únemi qoldaýy maǵan osy jolda kúsh bergen otbasyma jáne jaqyndaryma alǵys bildiremin, - dedi Gennadıı Golovkın.

GGG sonymen qatar jattyqtyrýshylary, kómekshileri, menedjerleri, jekpe-jek uıymdastyrýshylary jáne sportta da, ómirde de ony qoldaǵan barlyq adamdarǵa alǵys aıtty.

- Men sahna artynda jumys isteıtin keremet adamdarmen birge boldym. Olar tek boks mansabymdy ǵana emes, ómirimdi de shynymen qoldap júrgen adamdar, - dedi GGG rızashylyǵyn bildirip.

Gennadıı Golovkın kórermenderge bokstyń onyń ómiriniń bóligi bolyp júrgenine 35 jyl bolǵanyn aıtty. Al Dańq zalyna engizilýi – onyń eń mańyzdy jetistikteriniń biri.

- Dańq zalyna ený men úshin úlken qurmet. Bul moıyndaý men úshin sózben aıtyp jetkizý múmkin emes mánge ıe. Árıne, men bul moıyndaýdy múmkin etken barshaǵa alǵys aıtqym keledi. Men óte kishipeıilmin jáne osyndaı kórnekti adamdar qatarynda turǵanyma maqtanamyn. Sizderge raqmet, taǵy da úlken raqmet, - dep aıaqtady sózin Gennadıı Golovkın.

Resmı is-sharanyń aıaqtalǵanyna qaramastan qazaqstandyq boksshynyń jankúıerleri, negizinen amerıkalyq azamattar Gennadıı Golovkındi biraz ýaqyt boıy jibermeı turdy, ol jankúıerlerine qoltańbasyn berip, sýretke tústi.

Aıta ketý kerek, Halyqaralyq boks dańqy zalyna Golovkınmen qatar zamanaýı bokstyń erler sanatynda amerıkalyq Antonıo Tarver (Antonio Tarver) jáne aǵylshyn Naıdjel Benn (Nigel Benn), sondaı-aq zamanaýı bokstyń áıelder sanatynda japonııalyq Naoko Fýdzıoka (Naoko Fujioka) jáne meksıkalyq Djekı Nava (Jackie Nava) qabyldandy.

Sondaı-aq boksqa jatpaıtyn nomınatsııalarda: jattyqtyrýshy Rass Anber (Russ Anber), referı Frenk Kappýchıno (Frank Cappuccino), jattyqtyrýshy Djımmı Glenn (Jimmy Glenn), dáriger Edvın «Flıp» Homanskı (Dr.Edwin «Flip» Homansky), tilshi Kevın Iole (Kevin Iole), telejúrgizýshi Aleks Vallaý (Alex Wallau) jáne boks ardageri Djımmı Klebbı (Jimmy Clabby) esimderi kirdi.

Osyǵan deıin Halyqaralyq boks dańqy zalyna qabyldanǵan tuńǵysh qazaqstandyq Gennadıı Golovkın AQSh-tyń Kanastota qalasynda jankúıerlerimen kezdesip, tarıhı rásim qarsańyndaǵy kóńil kúıimen bólisti.