Gennadıı Golovkın Bangkokta Asian Boxing basshylyǵymen kezdesti

ASTANA. KAZINFORM – World Boxing prezıdenttigine úmitker Gennadıı Golovkın Asian Boxing ýaqytsha prezıdenti jáne Taıland boks qaýymdastyǵynyń basshysy Pıchaı Chýnhavadjıramen kezdesti.

Ulttyq olımpıadalyq komıtettiń habarlaýynsha, kezdesý barysynda taraptar Azııadaǵy bokstyń qazirgi jaǵdaıyn talqylap, aımaqta ádildik, ashyqtyq pen sapaly basqarýdy nyǵaıtýǵa baǵyttalǵan yntymaqtastyqtyń negizgi baǵyttaryn qarastyrdy. 

Sonymen qatar halyqaralyq júıeni birkelki etý, sportshylar men federatsııalar úshin teń múmkindikter jasaý máselelerine aıryqsha nazar aýdaryldy. Qatysýshylar Azııa óńirin olımpıadalyq bokstyń basty ortalyqtarynyń biri dep baǵalap, munda uıymdastyrýshylyq deńgeıi men sporttaǵy básekelestik joǵary ekenin aıtty.

Basqosý kezinde Gennadıı Golovkınniń bul aımaqpen baılanysy erekshe atap ótildi. Dál osy jerde onyń bokstaǵy mansaby bastalǵan. Taraptar Azııanyń búginde senimdi nyǵaıtyp, sporttyń halyqaralyq bedelin arttyrýǵa zor úles qosyp otyrǵanyn ári eń qarqyndy damyp kele jatqan qurlyqtardyń biri ekenin basa aıtty. 

– Azııa álemdik bokstyń damýyna dástúrli túrde mańyzdy úles qosyp keledi. Federatsııalar, bapkerler men sportshylardyń basyn qosa otyryp, bizdiń sportqa degen senimdi nyǵaıtyp, barshaǵa teń múmkindik jasaı alamyz, - dedi Gennadıı Golovkın. 

Kezdesýde jarys júıesin jetildirý, sportshylardyń quqyqtaryn qorǵaý jáne jattyqtyrýshylar men resmı tulǵalarǵa arnalǵan bilim berý baǵdarlamalaryn júzege asyrý máseleleri de talqylandy.

Kelissóz barysynda taraptar seriktestik baılanystardy nyǵaıtýǵa jáne Azııadaǵy boksty ádildik, ashyqtyq pen jaýapkershilik qaǵıdattaryna súıene otyryp damytýǵa nıetti ekenin rastady.