Gennadıı Golovkın: Astanada jekpe-jekti 2017 jyly uıymdastyrýǵa bolady
ASTANA. QazAqparat - Qazaqstandyq kásipqoı boksshy, orta salmaqta WBA, IBF IBO jáne WBC chempıony Gennadıı Golovkın 2017 jyly jekpe-jekti Qazaqstanda ótkizýge bolady dep esepteıdi. Bul týraly ol Astanada jankúıerlermen bolǵan kezdesýinde xabarlady.
«Búgin biz amerıkalyq HBO telearnasynyń komandasyn alyp keldik. Olar bizdiń bul jekpe-jekti qanshalyqty joǵary deńgeıde ótkize alatyndyǵymyzdy baǵamdaıtyn bolady. Menińshe, bul jekpe-jek az degende kelesi jyly ótkiziler edi. Eger bunyń barlyǵy qoldan kelse», - dedi G. Golovkın jankúıerlerge bergen jaýabynda.
Chempıonnyń sózi boıynsha, qazirgi ýaqytta GGG jekpe-jegin Astanada «EKSPO-2017» kórmesi aıasynda ótkizý múmkindigi boıynsha kópdeńgeıli kelissózder ótýde.
«Biz kelissóz júrgizip jatyrmyz. Sózsiz, jekpe-jektiń birin Qazaqstanda - óz jankúıerleriń úshin ótkizý meniń oıymda bar. Bizdiń elde naǵyz álem tanyǵan dańqty chempıondardyń qatysýymen barsha álemge dúrkiretip boks keshin uıymdastyrsaq qanekı. Bizdiń el oǵan laıyq emes pe!?», - dep atap ótti Gennadıı Golovkın.
Bunyń aldynda xabarlanǵandaı, HBO telearnasynyń túsirý toby orta salmaqtaǵy sýperchempıon Gennadıı Golovkın týraly arnaıy joba túsirý úshin Qazaqstanǵa kelgen bolatyn. Túsirilim negizinen, boksshynyń týǵan jeri Maıqudyqta ótpek.
