Gennadıı Golovkın America's Got Talent shoýyna qatysqan Danelııa Tóleshovany qoldaýǵa shaqyrdy

ALMATY. QazAqparat - Qazaqstandyq boksshy Gennadıı Golovkın America's Got Talent shoýynda baq synap jatqan jas ánshi Danelııa Tóleshovany qoldaýǵa shaqyrdy, dep habarlaıdy QazAqparat tilshisi.

Sportshy Twitter paraqshasynda amerıkandyqtardy Danelııaǵa daýys berýge úndedi.

«Danelııa Tóleshova qandaı talantty! Biz seni maqtan tutamyz! Qoldap daýys bereıik», - dep jazdy Golovkın.

Aıta ketý kerek, 14 jastaǵy qazaqstandyq ánshi Danelııa Tóleshova America’s Got Talent fınalynda óner kórsetken bolatyn.

Fınalda 14 jasar qazaqstandyq jas daryn Sia atty tanymal ánshiniń «Alive» ánin shyrqady.

Jalpy, baıqaýdyń sońǵy sheshýshi kezeńinde 10 ánshi baq synaǵan, onyń ishinde altaýy - ártúrli jastaǵy vokalıster.

Eske salar bolsaq, Danelııa Tóleshova shilde aıynyń sońynda amerıkalyq America’s Got Talent jobasynyń úshinshi týryna ótken bolatyn. Álemge tanymal baıqaý pandemııaǵa baılanysty onlaın formatta uıymdastyryldy.

Jas ánshi baıqaýda qazylar alqasyn tań qaldyrǵan edi. Onyń ónerine tánti bolǵan zal tik turyp, qol soqty.